તા. ૧૦ નવેમ્બરે ર૦ર૫ વિક્રમ સંવત ર૦૮૨ કારતક વદ – ૬ સોમવાર
News of Wednesday, 19th June 2024
પત્નિનું કેન્સરથી મોત થયું : મિનિટોની અંદર જ IPS પતિએ જીવન ટૂંકાવ્યું
સર્વિસ રિવોલ્વરથી લમણે ગોળી મારી દીધી : તેમને રાષ્ટ્રપતિના એવોર્ડથી સન્માનિત કરવામાં આવ્યા હતા

ગુવાહાટી, તા.૧૯: આસામના ગૃહ સચિવ અને આઈપીએસ અધિકારીએ પોતાની પત્નીના મૃત્યુ બાદ થોડી જ મિનિટોમાં પોતાની રિવોલ્વરથી પોતાનો જીવ પણ આપી દીધો છે. ૪૪ વર્ષના હોમ સેક્રેટરી શીલાદિત્ય ચેટિયાની પત્ની અગામોની બોરબરુઆ કેન્સરથી પીડાતી હતી. પત્નીનું હોસ્પિટલના આઈસીયુમાં નિધન થતા જ આઈપીએસ ઓફિસર શીલાદિત્ય ચેટિયા આઈસીયુમાં ગયા હતા, અંદરના સ્ટાફને થોડી મિનિટો માટે બહાર જવા વિનંતી કરી અને પછી પોતાની સર્વિસ રિવોલ્વરથી લમણે ગોળી મારી દીધી હતી. શીલાદિત્ય ચેટિયા પોતાની સર્વિસ દરમિયાન બહુ પ્રશંસા પામ્યા હતા અને તેમને રાષ્ટ્રપતિના એવોર્ડથી સન્માનિત કરવામાં આવ્યા હતા.
ચેટિયાના પત્નીની ઉંમર ૪૦ વર્ષ હતી અને કેટલાક સમયથી તેમને કેન્સર હતું. તેમણે મંગળવારે સાંજે ૪.૨૫ વાગ્યે ગુવાહાટીની નેમકેર હોસ્પિટલમાં અંતિમ શ્વાસ લીધા હતા. ત્યાર પછી તેમના પતિ અને હોમ સેક્રેટરી શીલાદિત્ય ચેટિયા આઈસીયુમાં આવ્યા. તેમણે સ્ટાફને વિનંતી કરી કે થોડા સમય માટે તેઓ એકાંતમાં પ્રાર્થના કરવા માગે છે. આઈસીયુનો સ્ટાફ બહાર ગયો ત્યારે તેમણે પોતાના હથિયારથી જીવ ટૂંકાવ્યો હતો.
તાજેતરમાં ચેટિયા દંપતી સારવાર માટે ચેન્નાઈ પણ રહેવા ગયું હતું પરંતુ કોઈ ફાયદો થયો ન હતો. શીલાદિત્ય ચેટિયાએ થોડા સમય અગાઉ પોતાની માતાને ગુમાવી હતી અને તેના સાસુનું પણ અવસાન થયું હતું. ૪૪ વર્ષીય શીલાદિત્ય ચેટિયા ૨૦૦૯ની બેચના આઈપીએસ ઓફિસર હતા. તેઓ પોતાની બહાદુરી માટે જાણીતા હતા અને ૨૦૧૫માં તેમને પ્રેસિડન્ટ્સ પોલીસ મેડલ દ્વારા સન્માનિત કરવામાં આવ્યા હતા.
નેમકેર હોસ્પિટલ એક -ાઈવેટ હોસ્પિટલ છે અને તેના મેનેજિંગ ડિરેકટર હિતેશ બરુઆએ કહ્યું કે અમે ગોળીબારનો અવાજ સાંભળીને તરત આઈસીયુમાં દોડી ગયા અને જોયું તો શીલાદિત્ય ચેટિયા તેમના પત્નીના બોડીની બાજુમાં પડ્યા હતા. અમે તેમને બચાવવાનો -યાસ કર્યો પરંતુ બચાવી ન શકાયા. તેમણે પોતાની જાતને ગોળી મારી દીધી હતી. આ હોસ્પિટલમાં શીલાદિત્યના પત્ની ત્રણ મહિનાથી સારવાર લઈ રહ્યા હતા. ત્રણ દિવસ અગાઉ તેમની હાલત કથળી હતી. અમે ચેટિયાને આખી વાત સમજાવી અને તેઓ સમજી ગયા હતા. શીલાદિત્ય અને અગામોની બરુઆએ મે ૨૦૧૩માં એરેન્જ્ડ મેરેજ કર્યા હતા અને તેમને કોઈ સંતાન ન હતું.
આસામના હોમ અને પોલિટિકલ સેક્રેટરી શીલાદિત્ય ચેટિયા કેટલાક સમયથી પર્સનલ લાઈફમાં ઘણી તકલીફોમાંથી પસાર થઈ રહ્યા હતા. તેમના પત્નીને કેન્સર હતું, બીજા વડીલોના પણ તાજેતરમાં જ મોત થયા હતા. પરંતુ પત્નીના મોતે તેમને જે આંચકો આપ્યો તેને તેઓ સહન કરી શક્યા નહીં તેવું આસામના પોલીસ ડીજીપી ભાસ્કરજ્યોતિ મહંતાએ જણાવ્યું હતું.
આસામના ડીજીપીએ કહ્યું કે શીલાદિત્ય ચેટિયા મારા માટે નાના ભાઈ સમાન હતા. મને આ ટ્રેજેડીની ખબર પડી તો હું નેમકેર હોસ્પિટલ પહોંચ્યો. તેમના જીવનમાં ઘણી તકલીફો હતી. તેઓ પત્નીની સારસંભાળ રાખી રહ્યા હતા. હું તેમની સાથે ટચમાં હતો. પરંતુ મને ખબર ન હતી કે તેઓ આવું કોઈ પગલું લેવા વિચારે છે.
શીલાદિત્ય ચેટિયાના પિતા પણ પોલીસ ઓફિસર હતા અને પોતે આસામના અલગ અલગ જિલ્લાઓમાં એસપી રહી ચૂક્યા હતા. તેમણે આસામમાં ખૂંખાર ગુનેગારો અને ત્રાસવાદીઓ સામે સફળતાથી ઓપરેશન પાર પાડ્યા હતા અનને પોતાના ડેરિંગ માટે જાણીતા હતા. યુવાનીમાં તેઓ ભણવામાં બહુ હોશિયાર હતા અને તેઝપુર યુનિવર્સિટીમાં તેઓ એક ટોપર સ્ટુડન્ટ હતા.
(4:14 PM IST)









છેલ્લા 8 દિવસમાં સૌથી લોકપ્રિય 
