નવી દિલ્‍હી તા. ૨૪ : કેન્‍દ્ર સરકારે મેટરનિટી લીવના મામલે મોટા ફેરફારો  કર્યા છે. કેન્‍દ્ર સરકારે સરોગસી સંબંધિત નિયમોમાં સુધારો કર્યો છે. સરકારના આ નિર્ણય બાદ હવે સરકારી કર્મચારીઓ ૧૮૦ દિવસ સુધીની રજા મેળવી શકશે. ડિપાર્ટમેન્‍ટ ઓફ પર્સોનલ એન્‍ડ ટ્રેનિંગે ૧૮ જૂને આ સંદર્ભમાં એક નોટિફિકેશન બહાર પાડ્‍યું હતું. આ મુજબ, કેન્‍દ્ર સરકારની આવી મહિલા કર્મચારીઓ જેમણે સરોગસી દ્વારા બાળકને જન્‍મ આપ્‍યો છે તેઓ હવે છ મહિનાની પ્રસૂતિ રજા માટે હકદાર બનશે. આવી મહિલા કર્મચારી માટે, જો ગર્ભ (સરોગેટ મધર) આપનારી મહિલા પણ કેન્‍દ્રની કર્મચારી હશે, તો બંને માતાઓને છ મહિનાની પ્રસૂતિ રજા મળશે. જો કે તેની શરત એ હશે કે આવી મહિલાઓના જીવતા બાળકોની સંખ્‍યા બે કરતા ઓછી હોવી જોઈએ.

નવા નિયમો હેઠળ સરોગેટ માતાની સાથે બીજી માતાને સરોગેટ મધર તરીકે ઓળખવામાં આવી છે. કસ્‍ટોડિયલ માતા બાળકની સંભાળ રાખવા માટે બે વર્ષની બાળ સંભાળ રજા માટે પાત્ર હશે, જે બાળક ૧૮ વર્ષનું થાય ત્‍યાં સુધી મેળવી શકાય છે. જો બાળકના વાલી પિતા પણ સરકારી કર્મચારી હોય તો તે પણ ૧૫ દિવસની પિતૃત્‍વ રજા માટે પાત્ર બનશે. નવા નિયમો ૧૮ જૂનથી લાગુ થઈ ગયા છે.

કેન્‍દ્ર સરકાર દ્વારા જારી કરવામાં આવેલા નોટિફિકેશન મુજબ, સરોગસી દ્વારા બાળકોને જન્‍મ આપનારી માતાઓ અને બાળકોને દત્તક લેનાર માતા-પિતા માટે રજાઓની જરૂરિયાતને ધ્‍યાનમાં રાખીને સરકારે મોટો નિર્ણય લીધો છે. સરકારે કહ્યું છે કે હવે સરોગસીના મામલામાં ૧૮૦ દિવસ સુધી મેટરનિટી લીવ લઈ શકાશે. કેન્‍દ્ર સરકારના કર્મચારી જે સરોગેટ છે તે ૧૮૦ દિવસની રજા મેળવી શકશે. સંશોધિત નિયમોની સૂચના કર્મચારી મંત્રાલય દ્વારા જારી કરવામાં આવી છે. આ મુજબ હવે સરોગેટની સાથે સરોગેટ મધર (જૈવિક માતા) પણ ૧૮૦ દિવસની રજાની સુવિધા મેળવી શકશે.

નવા નિયમોને અસર કરવા માટે સરકારે સેન્‍ટ્રલ સિવિલ સર્વિસીસ (લીવ) નિયમો, ૧૯૭૨માં સુધારો કર્યો છે. હવે કેન્‍દ્રીય કર્મચારીઓને તેનો લાભ મળશે. સુધારા મુજબ, સરોગસી માટે કમિશનિંગ કરતી માતા, જેમની પાસે બે કરતાં ઓછા જીવતા બાળકો છે, તે પણ બાળ સંભાળ રજા મેળવવા માટે પાત્ર બનશે. આ સાથે સરકારે સરોગસી માટે પિતૃત્‍વ રજાને લઈને પણ મોટો નિર્ણય લીધો છે. હવે, કમિશ્‍ડ સેન્‍ટ્રલ કર્મચારીઓના પિતા કે જેમની પાસે બે કરતા ઓછા હયાત બાળકો છે તેઓ બાળકના જન્‍મના છ મહિનામાં ૧૫ દિવસની પિતૃત્‍વ રજા માટે હકદાર બનશે.