લગ્ન માટે કોઇ યુવતી તૈયાર નથી, કન્યા શોધી આપોઃ યુવાને સરકારમાં અરજી કરી
કર્ણાટકના ખેડૂતે જિલ્લા કમિશનરને પત્ર લખી વિચિત્ર વિનંતી કરી
બેંગલુરૂ,તા. ૨૮: કર્ણાટકના કોપ્પલ જિલ્લામાં જાહેર ફરિયાદ નિવારણ કેન્દ્રમાં પહોંચેલા એક ખેડૂતે જિલ્લા વહીવટીતંત્ર સમક્ષ એક વિચિત્ર માગણી કરી છે. તેણે જિલ્લા કમિશ્નરને જણાવ્યું હતું કે તેને લગ્ન માટે કન્યા મળી શકી નથી. સરકારને વિનંતી છે કે તેઓ આ કામમાં મારી મદદ કરે. ખેડૂતે પોતાના માટે કન્યા શોધવા માટે જિલ્લા કમિશ્નરને લેખિત પત્ર પણ રજૂ કર્યો હતો. ખેડૂતનું કહેવું છે કે તે ૧૦ વર્ષથી કન્યાની શોધમાં છે અને અત્યાર સુધીમાં તે જે યુવતીઓને મળ્યો છે તેમાંથી કોઈ તેની સાથે લગ્ન કરવા તૈયાર નથી.
જાહેર ફરિયાદ નિવારણ કાર્યક્રમ દરમિયાન, સંગપ્પા નામના એક ખેડૂતે વહીવટી અધિકારીઓને તેના માટે કન્યા શોધવામાં મદદ કરવા વિનંતી કરી છે. સંગપ્પાએ પોતાના માટે જીવનસંગિની શોધવામાં મદદ માટે અરજી પણ સબમિટ કરી હતી. મળતી માહિતી મુજબ, સંગપ્પા પોતાની અરજી લઈને જિલ્લા કમિશ્નર નલિની અતુલ પાસે પહોંચ્યો હતો, જેમાં તેણે જણાવ્યું હતું કે તે છેલ્લા ૧૦ વર્ષથી કન્યાની શોધમાં છે અને કોઈ યુવતી તેની સાથે લગ્ન કરવા તૈયાર નથી. ખેડૂતે વધુમાં જણાવ્યું હતું કે છેલ્લા દાયકા દરમિયાન તે જે પરિસ્થિતિમાંથી પસાર થયો છે તેનાથી તેના માનસિક સ્વાસ્થ્ય પર ગંભીર અસર પડી છે. સંગપ્પાએ પોતાના પત્રમાં લખ્યું હતું કે સર, હું છેલ્લા ૧૦ વર્ષથી લગ્ન માટે યોગ્ય યુવતીની શોધ કરી રહ્યો છું. ઘણા લાંબા સમય સુધી શોધ કરવા છતાં હજુ સુધી મને સફળતા મળી નથી. કૃપા કરીને મને કન્યા શોધવામાં મદદ કરો. ખેડૂતની આ વિચિત્ર વિનંતી ચર્ચાનો વિષય બની છે.
(9:57 AM IST)
છેલ્લા 8 દિવસમાં સૌથી લોકપ્રિય 
