નવી દિલ્હી તા.૨૮ : ભારતના ઘણા રાજ્યોમાં ચોમાસાનું આગમન થઈ ગયું છે, દિલ્હીમાં પણ ઘણા વિસ્તારો પાણીમાં ડૂબી ગયા છે. દર વખતની જેમ હિમાલયના રાજ્યોમાં વાદળ ફાટવાના સમાચાર આવવા લાગ્યા છે. ભારતીય હિમાલયનો વિસ્તાર અત્યંત સંવેદનશીલ છે. જમ્મુ-કાશ્મીર, લેહ-લદ્દાખ, હિમાચલ પ્રદેશ, ઉત્તરાખંડ અને પૂર્વોત્તર રાજ્યોમાં ભારે વરસાદ બાદ સ્થિતિ વધુ ખરાબ થઈ છે. હિમાચલ પ્રદેશના મુખ્યમંત્રી સુખવિંદર સિંહ સુખુએ પણ કહ્યું કે રાજ્યમાંથી વાદળ ફાટવાની ઘટનાઓ સામે આવી રહી છે.

ભારતીય હવામાન વિભાગ (IMD) એ ઉત્તર ભારત અને દિલ્હી-NCRમાં ચોમાસાને લઈને મોટી માહિતી આપી છે. IMD કહે છે કે ઉત્તર ભારતમાં આગામી 2-3 દિવસ સુધી ભારેથી અતિ ભારે વરસાદની અપેક્ષા છે, ખાસ કરીને ઉત્તર પ્રદેશમાં, જ્યારે દિલ્હી માટે પણ ભારે વરસાદની ચેતવણી જારી કરવામાં આવી છે.

વાદળ ફાટવાની ઘટનાઓ બની રહી છે - મુખ્યમંત્રી સુખુ 

હિમાચલ પ્રદેશના મુખ્યમંત્રી સુખવિન્દર સિંહ સુખુએ કહ્યું, 'મેઘ ફાટવાની ઘટનાઓ પ્રકાશમાં આવી રહી છે. હું હિમાચલના લોકોને વિનંતી કરું છું કે તેઓ વરસાદની મોસમમાં નદીઓ અને નાળાઓના કિનારે ન જાય, અમે ડિઝાસ્ટર મેનેજમેન્ટને લઈને એક બેઠક કરી ચૂક્યા છીએ. દરેકને એલર્ટ રહેવા માટે કહેવામાં આવ્યું છે

IMDએ જણાવ્યું કે દક્ષિણ પશ્ચિમ ચોમાસું રાજસ્થાનના કેટલાક ભાગો, હરિયાણાના કેટલાક જિલ્લાઓ, સમગ્ર દિલ્હી, પશ્ચિમ ઉત્તર પ્રદેશના કેટલાક વિસ્તારો, મધ્ય પ્રદેશ, છત્તીસગઢ, પશ્ચિમ બંગાળ, ઝારખંડ, બિહારમાં આગળ વધી રહ્યું છે.

પશ્ચિમ બંગાળમાં પણ ભારે વરસાદની ચેતવણી

IMDના વૈજ્ઞાનિકોના જણાવ્યા અનુસાર બંગાળની ખાડીમાંથી આવતા મજબૂત દક્ષિણ-પશ્ચિમ પવનોને કારણે સમગ્ર પશ્ચિમ બંગાળમાં આગામી 4-5 દિવસ સુધી ભારે વરસાદ પડી શકે છે. હવામાન વિભાગનું કહેવું છે કે મજબૂત દક્ષિણ-પશ્ચિમ પવનોને કારણે સપ્તાહના અંત સુધીમાં દક્ષિણ બંગાળના જિલ્લાઓમાં કેટલાક સ્થળોએ ભારે વરસાદ પડી શકે છે.