બિહારમાં શુક્રવારે વધુ એક પુલ દુર્ઘટના સર્જાઈ હતી જે મધુબની જિલ્લાના ઝાંઝરપુરમાં એક નિર્માણાધીન પુલનો એક ભાગ ભારે વરસાદને કારણે તૂટી પડ્યો હતો. બિહારમાં છેલ્લા 11 દિવસમાં પુલ તૂટી પડવાની આ પાંચમી ઘટના છે.

   આ પહેલા કિશનગંજ, અરરિયા, પૂર્વ ચંપારણ અને સિવાનમાં પુલ ધરાશાયી થયા છે. આરજેડી નેતા અને પૂર્વ ડેપ્યુટી સીએમ તેજસ્વી યાદવે પણ આ મુદ્દે કેન્દ્ર અને બિહાર સરકાર પર નિશાન સાધ્યું છે.

    મળતી માહિતી મુજબ, મધુબનીમાં ભૂતિયા બાલન નદીમાં નિર્માણાધીન પુલનો બીમ પડી ગયો હતો. આ ઘટના મધેપુર બ્લોકના ભેજા સ્થિત લાલવારાહી ટોલામાં બની હતી. અહીં 25 મીટર લંબાઈનો બીમ અને લોખંડનું માળખું અચાનક ધરાશાયી થઈ ગયું હતું. 2.98 કરોડના ખર્ચે આ બ્રિજ બનાવવામાં આવી રહ્યો છે.

  બિહારમાં બ્રિજ ધરાશાયી થવાનો સિલસિલો 18 જૂનથી શરૂ થયો હતો. સૌ પ્રથમ, અરરિયા જિલ્લાના સિક્તીમાં બકરા નદી પર બનેલો પુલ તેના ઉદ્ઘાટન પહેલા જ તૂટી પડ્યો હતો. આ પછી 22 જૂને સિવાનના મહારાજગંજમાં ગંડક કેનાલ પર બનેલો પુલ ધરાશાયી થયો હતો. આ પછી તરત જ પૂર્વ ચંપારણ જિલ્લાના અમવામાં એક નિર્માણાધીન પુલ પણ તૂટી પડ્યો હતો. એક દિવસ પહેલા ગુરુવારે કિશનગંજ જિલ્લામાં મારિયા નદી પર બનેલો 13 વર્ષ જૂનો પુલ જોરદાર પ્રવાહને કારણે તૂટી પડ્યો હતો.

બિહારમાં પુલ તૂટી પડવાની ઘટનાઓ દેશભરમાં ચર્ચાનો વિષય બની છે. રોજેરોજ બનતા આ અકસ્માતોને કારણે બાંધકામ અને સમારકામની કામગીરી પર સવાલો ઉઠી રહ્યા છે. વિપક્ષના નેતા તેજસ્વી યાદવે શુક્રવારે તેમના સોશિયલ મીડિયા પ્લેટફોર્મ પર પોસ્ટ કર્યું કે બિહારમાં પાંચ પુલ તૂટી પડ્યા છે. સરકાર પર કટાક્ષ કરતા તેમણે લોકોને પૂછ્યું કે શું તમે આ જાણો છો, ન જાણતા હોવ તો સમજો તો જાણો.