નવી દિલ્હી :હિંસાગ્રસ્ત મણિપુરમાં શાંતિ સ્થાપવા માટે રાજ્યમાં દરરોજ રેલીઓનું આયોજન કરવામાં આવે છે. આ દરમિયાન મણિપુર હિંસાનું આંતરરાષ્ટ્રીય કનેક્શન સામે આવ્યું છે. ઇમ્ફાલના એક પોલીસ સ્ટેશનમાં ફરિયાદ દાખલ કરવામાં આવી હતી, જેમાં યુકેની એક યુનિવર્સિટીમાં ભણાવતા એક ભારતીય મૂળના પ્રોફેસર પર કથિત રીતે જાતિ હિંસાગ્રસ્ત મણિપુરમાં લોકોને ઓનલાઇન સંદેશાઓ અને સોશિયલ મીડિયા પ્લેટફોર્મ દ્વારા ઉશ્કેરવાનો આરોપ લગાવવામાં આવ્યો હતો.

  NDTVના અહેવાલ મુજબ, પોલીસ ફરિયાદમાં આરોપ લગાવવામાં આવ્યો છે કે આરોપી કેનેડામાં ખાલિસ્તાની તત્વો સાથે સંકળાયેલા હોઈ શકે છે. સ્થાનિક રહેવાસી દ્વારા દાખલ કરવામાં આવેલી એફઆઈઆરમાં કહેવામાં આવ્યું છે કે, "આરોપી વ્યક્તિએ જાણીજોઈને અને દૂષિત ઈરાદાથી મેઈટીઓની ધાર્મિક માન્યતાઓનું અપમાન કર્યું હતું અને ધાર્મિક આધાર પર મેઈટીઓ અને અન્ય સમુદાયો વચ્ચે દુશ્મનાવટને પ્રોત્સાહન આપ્યું હતું."

   રિપોર્ટ અનુસાર, આરોપીની ઓળખ બર્મિંગહામ યુનિવર્સિટીમાં કોમ્પ્યુટર સાયન્સના પ્રોફેસર ઉદય રેડ્ડી તરીકે થઈ હતી. આરોપ મુજબ, તે મણિપુરમાં ધાર્મિક આધાર પર સમુદાયો વચ્ચે તણાવ પેદા કરવા માટે ઓનલાઈન કામ કરી રહ્યો છે, આ બાબતે પ્રોફેસર ઉદય રેડ્ડી તરફથી હજુ સુધી કોઈ નિવેદન આવ્યું નથી.

 પોલીસના જણાવ્યા મુજબ, ફરિયાદીએ તેમને કહ્યું કે પ્રોફેસર ઉદય રેડ્ડી સોશિયલ મીડિયા પર ગ્રુપ ઑડિયો કૉલ્સ કરે છે અને મણિપુરમાં લોકોને રાજ્યમાં કાયદો અને વ્યવસ્થાને કેવી રીતે ખલેલ પહોંચાડવી તે અંગે સૂચના આપે છે.

  ફરિયાદીએ તેની એફઆઈઆરમાં જણાવ્યું હતું કે, આરોપી વ્યક્તિ અને તેના સહયોગીઓની ગેરકાયદેસર ગતિવિધિઓ દેશ વિરોધી ગતિવિધિઓ સમાન છે, જે દેશની અખંડિતતા અને સાર્વભૌમત્વને પડકારવા સમાન છે. આરોપીઓ સામે UAPA એક્ટ હેઠળ કાર્યવાહી થવી જોઈએ. આરોપીઓ કેનેડામાં ખાલિસ્તાનીઓ અને નાર્કો-ટેરરિસ્ટ જૂથો સાથે સંકળાયેલા હોવાની શક્યતા વધુ છે.