નવી દિલ્હી :દિલ્હી ક્રાઈમ બ્રાન્ચ અને STF સોનીપત પોલીસે સંયુક્ત ઓપરેશન હાથ ધરીને હિમાંશુભાઈ ગેંગના ત્રણ વોન્ટેડ ગુનેગારોને એન્કાઉન્ટરમાં ઠાર કર્યા છે. આ એન્કાઉન્ટર સોનીપતમાં થયું હતું, જેમાં બંને તરફથી ડઝનબંધ ગોળીઓ ચલાવવામાં આવી હતી. આ દરમિયાન એક પોલીસકર્મી પણ ઘાયલ થયો છે.

 કહેવામાં આવી રહ્યું છે કે પોલીસે આરોપીઓને સરેન્ડર કરવા કહ્યું હતું, જેના બદલામાં તેઓએ પોલીસ પર ગોળીબાર કર્યો હતો. જવાબી ગોળીબારમાં ત્રણેય આરોપીઓ ઘાયલ થયા હતા, જે બાદ તેમને તાત્કાલિક સારવાર માટે હોસ્પિટલમાં લઈ જવામાં આવ્યા હતા, જ્યાં સારવાર દરમિયાન તેમનું મોત નીપજ્યું હતું. મૃતકોની ઓળખ આશિષ લાલુ, વિકાસ ઉર્ફે વિકી અને સની ગુર્જર તરીકે થઈ છે. હિમાંશુ ભાઉ ગેંગના આ શૂટર્સ દિલ્હીના રાજૌરી ગાર્ડનમાં બર્ગર કિંગ હત્યા કેસમાં વોન્ટેડ હતા

 . DCP અમિત ગોયલ પોતે ક્રાઈમ બ્રાન્ચ NDRની ટીમનું નેતૃત્વ કરી રહ્યા હતા. એન્કાઉન્ટરમાં તેના બુલેટપ્રૂફ જેકેટને પણ ગોળી વાગી હતી.

દિલ્હીના રાજૌરી ગાર્ડનના જે બ્લોકમાં સ્થિત 'બર્ગર કિંગ' રેસ્ટોરન્ટમાં એક વ્યક્તિની ગોળી મારીને હત્યા કરવામાં આવી હતી. આ દરમિયાન બે આરોપીઓએ લગભગ 40 રાઉન્ડ ગોળીઓ ચલાવી હતી, જેના કારણે વ્યક્તિનું ઘટનાસ્થળે જ મોત થયું હતું. આ પછી હુમલાખોરો સ્થળ પરથી ફરાર થઈ ગયા હતા.

 બર્ગર કિંગ રેસ્ટોરન્ટમાં હત્યાકાંડના થોડા કલાકો પછી, સોશિયલ મીડિયા પર એક પોસ્ટ આવી જેમાં વિદેશી ગેંગસ્ટર હિમાંશુ ભાઉએ હુમલાની જવાબદારી લીધી. પોસ્ટમાં કહેવામાં આવ્યું છે કે તેણે 'શકી દાદા'ની હત્યાનો બદલો લીધો હતો, જેની કથિત રીતે તેની હરીફ ગેંગ દ્વારા હત્યા કરવામાં આવી હતી. પોસ્ટમાં કથિત ગેંગસ્ટર નવીન બાલી, નીરજ બવાના, કાલા ખરમપુર અને નીરજ ફરીદપુરના નામ લખવામાં આવ્યા હતા.