<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 31st July 2024

રેલવેમાં 7 હજારથી વધુ પદો માટે અરજી પ્રક્રિયા શરૂ :44000 રૂપિયા મળશે પગાર

રેલવે ભરતી બોર્ડે જૂનિયર એન્જિનિયરની 7951 જગ્યાઓ માટે અરજીઓ મંગાવી

નવી દિલ્હી : રેલવે ભરતી બોર્ડે જૂનિયર એન્જિનિયરની 7951 જગ્યાઓ માટે અરજીઓ આમંત્રિત કરી છે. આ માટેની રજિસ્ટ્રેશન લિંક 30 જૂલાઇ મંગળવારના રોજ ઓપન થઇ ગઇ છે. જે ઉમેદવારો અરજી કરવા માટે જરૂરી પાત્રતા ધરાવતા હોય તેઓ નિયત ફોર્મેટમાં ફોર્મ ભરી શકે છે. આ માટે તેમણે તેમના રાજ્યની RRB વેબસાઇટ પર જવું પડશે.

આ જગ્યાઓ માટેની અરજીની શરૂઆત 30મી જૂલાઈથી થઇ છે. અરજી કરવાની છેલ્લી તારીખ 29મી ઓગસ્ટ 2024 છે. આ સમય મર્યાદામાં નિયત ફોર્મેટમાં અરજી કરો. ઉમેદવારો સમયસર તેમની અરજીમાં સુધારો પણ કરી શકે છે. આ માટે નક્કી કરાયેલી તારીખ 30 ઓગસ્ટથી 8 સપ્ટેમ્બર 2024 વચ્ચે છે.

આ ભરતી અભિયાન દ્વારા કુલ 7951 જગ્યાઓ પર લાયક ઉમેદવારોની નિમણૂક કરવામાં આવશે. તેમાંથી 7934 જગ્યાઓ જૂનિયર ઈજનેર, ડેપો મટીરીયલ સુપરિન્ટેન્ડેન્ટ અને કેમિકલ એન્ડ મેટાલર્જિકલ આસિસ્ટન્ટની છે. બાકીની 17 જગ્યાઓ કેમિકલ સુપરવાઈઝર/રિસર્ચ એન્ડ મેટાલર્જિકલ સુપરવાઈઝર/રિસર્ચ માટે છે. આ પોસ્ટ્સ માત્ર આરએબી ગોરખપુર માટે છે.

અરજી કરવા અથવા આ પોસ્ટ્સની વિગતો જાણવા માટે ઉમેદવારો આ વેબસાઇટની મુલાકાત લઈ શકે છે - rrbcdg.gov.in. આ સિવાય પરીક્ષા હેલ્પડેસ્ક નંબર છે – 0172 – 2730093.  

અરજી કરવા માટેની પાત્રતાના માપદંડ પોસ્ટ પ્રમાણે બદલાય છે. ઉદાહરણ તરીકે જૂનિયર એન્જિનિયર અને ડેપો મટિરિયલ સુપરિન્ટેન્ડન્ટની પોસ્ટ માટે સંબંધિત ટ્રેડમાં BE અથવા B.Tech ધરાવતા ઉમેદવારો અરજી કરી શકે છે. કેમિકલ અને મેટાલર્જિકલ આસિસ્ટન્ટની પોસ્ટ માટે ઉમેદવારો માન્ય યુનિવર્સિટીમાંથી ભૌતિકશાસ્ત્ર અને રસાયણશાસ્ત્ર સાથે B.Sc કર્યું છે તેઓ અરજી કરી શકે છે.

વય મર્યાદા 18 થી 33 વર્ષ છે. અનામત વર્ગને સરકારી નિયમો મુજબ વયમાં છૂટછાટ મળશે. વિગતો વેબસાઈટ પરથી જોઈ શકાશે.

 

આ પદો માટે અરજી કરવા માટે ઉમેદવારોએ 500 રૂપિયા ફી ચૂકવવી પડશે. SC, ST, લઘુમતીઓ માટે ફી 250 રૂપિયા છે. એક્સ-સર્વિસમેન, પીએચ, મહિલા અને ટ્રાન્સજેન્ડર માટે ફી 250 રૂપિયા છે.

  આ પોસ્ટ્સ પર પસંદગી ચાર તબક્કાની પરીક્ષા પાસ કર્યા પછી કરવામાં આવશે. પ્રથમ તબક્કામાં એટલે કે CBT I અને CBT II માં લેખિત પરીક્ષા લેવામાં આવશે. પ્રથમ તબક્કામાંથી પસાર થનાર જ આગળના તબક્કામાં જશે. બીજો તબક્કો પસાર કર્યા પછી ડોક્યુમેન્ટ વેરિફિકેશન થશે જેને સ્ટેજ III કહેવામાં આવશે અને ચોથા સ્ટેજમાં મેડિકલ ટેસ્ટ લેવામાં આવશે.

 

પગાર પણ પોસ્ટ પ્રમાણે છે. ઉદાહરણ તરીકે JE, ડેપો મટિરિયલ સુપરિન્ટેન્ડન્ટ, કેમિકલ અને મેટાલર્જિકલ આસિસ્ટન્ટ લેવલ 6 ની પોસ્ટ માટેનો પગાર 35,400 રૂપિયા છે. કેમિકલ સુપરવાઈઝર, રિસર્ચ અને મેટાલર્જિકલ સુપરવાઈઝરની પોસ્ટ માટે પગાર 44,900 રૂપિયા છે.

(12:48 PM IST)