નવી દિલ્હી :લોકસભામાં સમાજવાદી પાર્ટીના સાંસદ અખિલેશ યાદવ અને કેન્દ્રીય ગૃહમંત્રી અમિતભાઈ શાહ વચ્ચે હળવી બોલાચાલી જોવા મળી છે. જ્યારે અખિલેશ યાદવે લોકસભામાં વકફ (સુધારા) બિલ પર બોલતા સ્પીકરના અધિકારો પર ટિપ્પણી કરી તો ગૃહમંત્રી અમિતભાઈ શાહે તરત જ તેમને અટકાવ્યા. અમિતભાઈ શાહે ગૃહમાં જવાબ આપતા કહ્યું કે તમે આવી વાત કરી શકતા નથી.

 અખિલેશ યાદવે પહેલી વાર લોકસભામાં વકફ બિલ પર વાત કરી હતી. બિલનો વિરોધ કરતાં તેમણે કહ્યું હતું કે આ બિલ ખૂબ જ સારી રીતે વિચારેલા રાજકારણના ભાગરૂપે રજૂ કરવામાં આવી રહ્યું છે. સપાના વડા અખિલેશ યાદવે કહ્યું કે ભાજપ આ બિલ કેટલાક હતાશ અને નિરાશ સમર્થકો માટે લાવી રહ્યું છે. હું આ બિલનો વિરોધ કરું છું

    આ દરમિયાન અખિલેશે ટિપ્પણી કરી, 'સર, મેં લોબીમાં સાંભળ્યું કે તમારા કેટલાક અધિકારો પણ છીનવાઈ રહ્યા છે અને અમારે તમારા માટે લડવું પડશે.' સપા પ્રમુખના આ નિવેદન પર અમિતભાઈ શાહે ગૃહમાં જ તેમને જવાબ આપ્યો. કેન્દ્રીય ગૃહમંત્રીએ કહ્યું, 'અખિલેશ જી, શું તમે આવી વાત કરી શકતા નથી, શું તમે સ્પીકરના અધિકારના રક્ષક નથી?

    વક્ફ બોર્ડને સંચાલિત કરતા કાયદામાં સુધારો કરવા માટેનું બિલ લોકસભામાં રજૂ કરવામાં આવ્યું છે. કેન્દ્રીય લઘુમતી બાબતોના પ્રધાન કિરેન રિજિજુએ લોકસભામાં વકફ (સુધારા) બિલ 2024 રજૂ કર્યું. ગૃહમાં બિલ રજૂ થયા બાદ વિપક્ષે હોબાળો મચાવ્યો હતો.

   કોંગ્રેસ, TMC, NCP (SCP), સમાજવાદી પાર્ટી અને DMK સહિત વિપક્ષી પાર્ટીઓએ આ બિલનો વિરોધ કર્યો છે. કેન્દ્ર સરકાર વકફ બોર્ડ એક્ટ 1995માં પ્રસ્તાવિત સુધારો લઈને આવી છે, જેને વકફ (સુધારા) બિલ 2024 નામ આપવામાં આવ્યું છે. વકફ (સુધારા) બિલનો ઉદ્દેશ્ય વક્ફ બોર્ડમાં જવાબદારી અને પારદર્શિતા વધારવાનો છે, જેમાં મહિલાઓના ફરજિયાત સમાવેશનો સમાવેશ થાય છે.