નવી દિલ્હી : દિલ્હી પોલીસના સ્પેશિયલ સેલે ખતરનાક આતંકવાદી સંગઠન ઈસ્લામિક સ્ટેટ (ISIS)ના મોડ્યુલનો પર્દાફાશ કર્યો છે અને રાજધાનીમાં સ્વતંત્રતા દિવસની તૈયારીઓ વચ્ચે એક મોસ્ટ વોન્ટેડ આતંકવાદીની ધરપકડ કરી છે. કહેવામાં આવી રહ્યું છે કે તેની પાસેથી એક હથિયાર પણ મળી આવ્યું છે. રિઝવાનની દિલ્હીથી જ ધરપકડ કરવામાં આવી છે.

   ધરપકડ કરાયેલ આતંકવાદી રિઝવાન અલી દિલ્હીના દરિયાગંજ વિસ્તારનો રહેવાસી છે અને પુણે મોડ્યુલનો મુખ્ય ઓપરેટર છે. તે ગયા વર્ષે જુલાઈ 2023માં પુણે પોલીસની કસ્ટડીમાંથી ભાગી છૂટ્યા બાદ ફરાર થઈ ગયો હતો. નેશનલ ઇન્વેસ્ટિગેશન એજન્સી (NIA) સહિત દેશની તમામ એજન્સીઓ લાંબા સમયથી તેની શોધમાં વ્યસ્ત હતી. NIAની મોસ્ટ વોન્ટેડ લિસ્ટમાં સામેલ આ આતંકવાદી પર 3 લાખ રૂપિયાનું ઈનામ જાહેર કરવામાં આવ્યું હતું.

 15 ઓગસ્ટ પહેલા રિઝવાન અલીની ધરપકડ દિલ્હી પોલીસની સ્પેશિયલ સેલ માટે મોટી સફળતા છે. દિલ્હી પોલીસ અને NIA સહિતની તમામ એજન્સીઓ હવે તેની પૂછપરછ કરી રહી છે અને તેના આગળના પ્લાનિંગ વિશે માહિતી મેળવવાનો પ્રયાસ કરી રહી છે.

   દિલ્હી પોલીસે જણાવ્યું કે, ગુરુવાર, 8 ઓગસ્ટે NIAને વોન્ટેડ આતંકવાદી રિઝવાન અલી વિશે ગુપ્ત માહિતી મળી હતી. આ પછી દિલ્હી પોલીસે રાત્રે લગભગ 11 વાગે દિલ્હીના બાયોડાયવર્સિટી પાર્ક પાસે ગંગા બક્ષ માર્ગથી તેની ધરપકડ કરી હતી. ધરપકડ દરમિયાન તેના કબજામાંથી 3 જીવતા કારતુસ સાથે એક .30 બોરની સ્ટાર પિસ્તોલ અને બે મોબાઈલ ફોન મળી આવ્યા હતા. આ અંગે દિલ્હી પોલીસના સ્પેશિયલ સેલ પોલીસ સ્ટેશનમાં કેસ નોંધવામાં આવ્યો છે.

 કુખ્યાત આતંકવાદી રિઝવાન વિરુદ્ધ દિલ્હી-મુંબઈમાં ગંભીર અપરાધિક કલમો હેઠળ કેસ નોંધવામાં આવ્યા છે. હાલમાં NIA દ્વારા તેના તમામ કેસની તપાસ કરવામાં આવી રહી છે.