નવી દિલ્હી : સ્પોર્ટ્સ આર્બિટ્રેશને ભારતીય કુસ્તીબાજ વિનેશ ફોગાટની સિલ્વર મેડલ એનાયત કરવાની અપીલ પર નિર્ણય લેવાનો સમય વધુ 24 કલાક લંબાવ્યો છે. હવે આ મામલે નિર્ણય 11 ઓગસ્ટે આવે તેવી શક્યતા છે. અગાઉ CAS એ શનિવારે (10 ઓગસ્ટ) રાત્રે 9.30 વાગ્યે પોતાનો નિર્ણય જાહેર કરવાની જાહેરાત કરી હતી. પરંતુ નિર્ધારિત સમય પૂરો થયા બાદ તેમાં ફરી એકવાર ફેરફાર કરવામાં આવ્યો હતો અને તેને 24 કલાક માટે લંબાવવામાં આવ્યો હતો.

  પેરિસ ઓલિમ્પિકની ફાઇનલમાં 100 ગ્રામ વધારે વજન હોવાના કારણે સવારે ગેરલાયક ઠર્યા પછી, વિનેશ ફોગાટે તેની સામે કોર્ટ ઓફ આર્બિટ્રેશન ફોર સ્પોર્ટના એડ-હોક વિભાગમાં અપીલ કરી હતી અને સંયુક્ત સિલ્વર મેડલની માંગણી કરી હતી. આ કેસની સુનાવણી શુક્રવારે પૂર્ણ થઈ હતી અને શનિવારે નિર્ણય આવવાની આશા હતી. પરંતુ તેને મોકૂફ રાખવામાં આવ્યો છે.

  ભારતીય ઓલિમ્પિક સંઘે કહ્યું હતું કે તેને સકારાત્મક ઉકેલની આશા છે. ક્યુબાની કુસ્તીબાજ યુસ્નેલિસ ગુઝમેન લોપેઝે વિનેશના સ્થાને ફાઇનલમાં પ્રવેશ કર્યો હતો, જે સેમિફાઇનલમાં તેની સામે હારી ગઈ હતી. પોતાની અપીલમાં ભારતીય રેસલરે લોપેઝ સાથે સંયુક્ત સિલ્વર મેડલ આપવાની માંગ કરી હતી. "

  ઓલિમ્પિક રમતો સંબંધિત CAS આર્બિટ્રેશન નિયમોની કલમ 18 ની અરજીના અનુસંધાનમાં, CAS ના એડ હોક વિભાગના પ્રમુખે 10 ઓગસ્ટ 2024 ના રોજ પેરિસના સમય મુજબ 18:00 વાગ્યા સુધીમાં તેનો નિર્ણય આપવા માટે પેનલને હાકલ કરી છે," CAS એક નિવેદનમાં જણાવ્યું હતું કે સમયમર્યાદા લંબાવવામાં આવી છે.