નવી દિલ્હી :સુપ્રીમ કોર્ટે હડતાળ પર ઉતરેલા તબીબોને કામ પર પાછા ફરવા વિનંતી કરી છે. હડતાળ પર ઉતરેલા તબીબો સામે કોઈ કાર્યવાહી કરવામાં નહીં આવે તેવું પણ કહેવામાં આવ્યું છે. સુપ્રીમ કોર્ટે ગુરુવારે કોલકાતાની આરજી કાર મેડિકલ કોલેજ અને હોસ્પિટલમાં મહિલા ડૉક્ટર પર કથિત બળાત્કાર અને હત્યા સાથે સંબંધિત કેસોની સુનાવણી ફરી શરૂ કરી. સેન્ટ્રલ બ્યુરો ઓફ ઈન્વેસ્ટિગેશનને આજે આ કેસની તપાસ અંગે સ્ટેટસ રિપોર્ટ દાખલ કરવા માટે કહેવામાં આવ્યું છે.

   આ કેસની સુનાવણી દરમિયાન, ભારતના મુખ્ય ન્યાયાધીશ ડીવાય ચંદ્રચુડની આગેવાની હેઠળની સર્વોચ્ચ અદાલતની બેન્ચે પશ્ચિમ બંગાળ સરકારની આકરી ઝાટકણી કાઢી હતી અને બંગાળ પોલીસ તેમજ મેડિકલ કોલેજના ભૂતપૂર્વ પ્રિન્સિપાલ સંદીપ કુમાર ઘોષની ભૂમિકાની ટીકા કરી હતી. બેન્ચે ઘોષની ભૂમિકા પર પણ સવાલ ઉઠાવ્યા હતા અને કહ્યું હતું કે એવું લાગે છે કે હત્યાને આત્મહત્યા તરીકે રજૂ કરવાનો પ્રયાસ કરવામાં આવ્યો હતો. 

   સુપ્રીમ કોર્ટે પશ્ચિમ કોલકાતાની આરજી કાર મેડિકલ કોલેજ અને હોસ્પિટલના એક તાલીમાર્થી ડૉક્ટર સાથે કથિત બળાત્કાર અને હત્યાના મામલાની સ્વતઃ સંજ્ઞાન લેતા મંગળવારે 10 સભ્યોની નેશનલ ટાસ્ક ફોર્સ (NTF)ની રચના કરી હતી. ચીફ જસ્ટિસ ડીવાય ચંદ્રચુડ, જસ્ટિસ જેબી પારડીવાલા અને જસ્ટિસ મનોજ મિશ્રાની બેન્ચે પોતાનો આદેશ સંભળાવતા કહ્યું કે આ ટાસ્ક ફોર્સ મેડિકલ પ્રોફેશનલ્સની સુરક્ષા, સુખાકારી અને અન્ય સંબંધિત બાબતો પર ધ્યાન આપશે.

    આ સર્વોચ્ચ અદાલતની દેખરેખ હેઠળની ટાસ્ક ફોર્સ તબીબી વ્યાવસાયિકોની સલામતી સુનિશ્ચિત કરવા માટે રાષ્ટ્રીય પ્રોટોકોલ તૈયાર કરશે. દેશના જાણીતા વરિષ્ઠ ડોકટરો ઉપરાંત સરકારના ઘણા અગ્રણી વરિષ્ઠ અધિકારીઓ આ ટાસ્ક ફોર્સના હોદ્દેદાર સભ્યો હશે.

    NTF સભ્યોમાં સર્જન વાઇસ એડમિરલ આર સરીન, ડૉ. ડી નાગેશ્વર રેડ્ડી, ડૉ. એમ શ્રીનિવાસ, ડૉ. પ્રતિમા મૂર્તિ, ડૉ. ગોવર્ધન દત્ત પુરી, ડૉ. સૌમિત્રા રાવત, પ્રોફેસર અનિતા સક્સેના, ચીફ કાર્ડિયોલોજી, AIIMS દિલ્હી, પ્રોફેસર પલ્લવી સપ્રે, ડીન ગ્રાન્ટ મેડિકલ કૉલેજ મુંબઈનો સમાવેશ થાય છે. , ડૉ પદ્મા શ્રીવાસ્તવ, ન્યુરોલોજી વિભાગ, AIIMS, નેશનલ. ભારત સરકારના કેબિનેટ સચિવ, ભારત સરકારના ગૃહ સચિવ, કેન્દ્રીય આરોગ્ય મંત્રાલયના સચિવ, નેશનલ મેડિકલ કમિશનના અધ્યક્ષ, નેશનલ બોર્ડ ઓફ એક્ઝામિનર્સના અધ્યક્ષ તેના હોદ્દેદારો રહેશે.

 સુપ્રીમ કોર્ટે મંગળવારે સેન્ટ્રલ બ્યુરો ઑફ ઇન્વેસ્ટિગેશન (CBI) અને પશ્ચિમ બંગાળ સરકારને કોલકાતામાં બનેલી આ ભયાનક ઘટનાના કેસમાં 22 ઓગસ્ટ સુધીમાં અલગ-અલગ તપાસની પ્રગતિની વિગતો સબમિટ કરવાનો નિર્દેશ આપ્યો છે. ખંડપીઠે આ કેસની તપાસ કરી રહેલી સીબીઆઈને 22 ઓગસ્ટ, 2024ના રોજ કોર્ટમાં તપાસની પ્રગતિની વિગતો રજૂ કરવાનો નિર્દેશ આપ્યો હતો.