જર્મનીના ઝોલિંગેન શહેરમાં શનિવારે બનેલી છરાબાજીની ઘટનામાં પોલીસે વધુ એક શકમંદની ધરપકડ કરી છે.

જર્મનીના એક પ્રાદેશિક મંત્રીએ આ માહિતી આપી છે.  શનિવારે ઝોલિંગેન શહેરમાં છરાબાજીની ઘટનામાં ત્રણ લોકો માર્યા ગયા હતા અને આઠ ઘાયલ થયા હતા.

આ ઘટના અંગે માહિતી આપતાં જર્મનીના નોર્થ રાઈન-વેસ્ટફેલિયા રાજ્યના ગૃહમંત્રી હર્બર્ટ રુલે શનિવારે મોડી રાત્રે જણાવ્યું હતું કે, "જે વ્યક્તિને અમે આખો દિવસ શોધતા હતા તેની અટકાયત કરવામાં આવી છે."

 જો કે, તેણે આ સિવાય અન્ય કોઈ માહિતી શેર કરી નથી. જર્મનીની બિલ્ડ અને સ્પીગલ ન્યૂઝ વેબસાઈટ્સે અહેવાલ આપ્યો હતો કે જ્યારે શંકાસ્પદ વ્યક્તિએ આત્મસમર્પણ કર્યું ત્યારે તેના કપડાં લોહીથી ખરડાયેલા હતા.

જર્મનીના ચાન્સેલર ઓલાફ સ્કોલ્ટ્ઝે તેને ભયાનક ઘટના ગણાવી છે.  આ સમગ્ર કેસમાં અત્યાર સુધીની આ ત્રીજી ધરપકડ છે.

અગાઉ, પોલીસે હુમલાના સ્થળની નજીક સ્થિત શરણાર્થી શિબિરમાંથી એક વ્યક્તિની અટકાયત કરી હતી.  આ સમગ્ર મામલામાં સૌથી પહેલા ૧૫ વર્ષના છોકરાની ધરપકડ કરવામાં આવી હતી.

જોકે અધિકારીઓએ જણાવ્યું હતું કે છોકરો મુખ્ય શંકાસ્પદ ન હતો, તે ચોક્કસપણે હુમલાથી વાકેફ હતો.

શરૂઆતમાં ઈસ્લામિક સ્ટેટે આ હુમલાની જવાબદારી લીધી હતી. જો કે હજુ સુધી એ જાણી શકાયું નથી કે હુમલાખોરનું ઈસ્લામિક સ્ટેટ સાથે કોઈ જોડાણ છે કે નહીં.