નવી દિલ્હી : હિઝબુલ્લાહ અને ઇઝરાયલ વચ્ચે ચાલી રહેલા યુદ્ધે ફરી નવો અને ખતરનાક વળાંક લીધો છે. બંને વચ્ચેના હુમલાઓએ પહેલેથી જ તણાવપૂર્ણ પરિસ્થિતિને વધુ જટિલ બનાવી દીધી છે. 7 ઓક્ટોબરે શરૂ થયેલો સંઘર્ષ હવે પ્રાદેશિક સ્થિરતા માટે ગંભીર ખતરો ઉભો કરી રહ્યો છે. ઇઝરાયેલી વાયુસેનાએ લેબેનોનમાં હિઝબુલ્લાહના સ્થાનો પર હુમલો કર્યો. 

  ઇઝરાયેલની સેનાએ લગભગ 100 ફાઇટર પ્લેન વડે લેબનોનમાં અનેક આતંકવાદી ટાર્ગેટ પર હુમલો કર્યો, જ્યારે ઇરાન સમર્થિત જૂથ હિઝબુલ્લાહ મોટા હુમલાની તૈયારી કરી રહ્યું હતું અને તેના જવાબમાં હિઝબોલ્લાહે લેબનોનથી ઇઝરાયેલના પ્રદેશ તરફ 320 થી વધુ રોકેટ છોડ્યા હતા. મિસાઇલો અને વિસ્ફોટકોથી ભરેલા ડ્રોન્સની બેરેજની જવાબદારી સ્વીકારતા, હિઝબુલ્લાએ કહ્યું કે તેણે તેના લશ્કરી કમાન્ડર ફુઆદ શુક્રની હત્યાના જવાબમાં હુમલો કર્યો.

   ઇઝરાયલના સુરક્ષા પ્રધાને આગામી 48 કલાક માટે કટોકટીની સ્થિતિ જાહેર કરી હતી, જ્યારે વડા પ્રધાન નેતન્યાહુએ ઉત્તરમાં વધતી જતી પરિસ્થિતિને લઈને ઉચ્ચ સ્તરીય બેઠકની અધ્યક્ષતા કરી હતી. તેમણે કહ્યું હતું કે. અમે અમારા દેશનો બચાવ કરવા માટે ઉત્તરના રહેવાસીઓને તેમના ઘરે સુરક્ષિત રીતે પરત કરવા માટે તમામ પ્રયાસો કરીશું. નેતન્યાહુએ જણાવ્યું હતું કે, જે કોઈ અમને નુકસાન પહોંચાડે છે, અમે તેને નુકસાન પહોંચાડીશું.

    વ્હાઇટ હાઉસ નેશનલ સિક્યુરિટી કાઉન્સિલના પ્રવક્તા સીન સેવેટે જણાવ્યું હતું કે ઇઝરાયેલ અને હિઝબુલ્લાહ વચ્ચે તણાવ વધી રહ્યો છે, અમેરિકાના રાષ્ટ્રપતિ જો બાઈડન ઇઝરાયેલ અને લેબનોનમાં ઘટનાઓને પર નજર રાખી રહ્યા છે. અમે ઇઝરાયેલના પોતાના બચાવના અધિકારને સમર્થન આપવાનું ચાલુ રાખીશું અને અમે પ્રાદેશિક સ્થિરતા માટે કામ કરવાનું ચાલુ રાખીશું.

IDFએ જણાવ્યું હતું કે તેઓને જાણવા મળ્યું છે કે હિઝબોલ્લાહ ઇઝરાયેલના પ્રદેશ તરફ મિસાઇલ અને રોકેટ છોડવાની તૈયારી કરી રહ્યું છે. ધમકીઓના જવાબમાં ઇઝરાયેલે દક્ષિણ લેબનોનમાં હિઝબોલ્લાહ સામે મિસાઇલો છોડ્યા હતા.