નવી દિલ્હી :રાજ્યસભા ચૂંટણી: નવ રાજ્યોમાં રાજ્યસભાની 12 બેઠકો પરથી પહેલાથી જ ભાજપના પાંચ ઉમેદવારોએ બિનહરીફ ચૂંટણી જીતી લીધી છે. રાજસ્થાનમાંથી રવનીત સિંહ બિટ્ટુ, બિહારમાંથી ઉપેન્દ્ર કુશવાહા અને મનન મિશ્રા ચૂંટણી જીત્યા છે. હરિયાણામાં ભાજપના ઉમેદવાર કિરણ ચૌધરીએ પણ બિનહરીફ ચૂંટણી જીતી છે. જ્યોર્જ કુરિયન મધ્ય પ્રદેશમાંથી જીત્યા છે .

  કેન્દ્રીય રાજ્ય મંત્રી અને બીજેપી નેતા રવનીત સિંહ બિટ્ટુ રાજ્યસભાની ચૂંટણી બિનહરીફ જીતી ગયા છે. મંગળવારે એટલે કે 27મી ઓગસ્ટે નામાંકન પરત ખેંચવાની છેલ્લી તારીખ હતી. રાજ્યસભાની પેટાચૂંટણીમાં ત્રણ ઉમેદવારોએ ઉમેદવારી નોંધાવી હતી. જેમાંથી એક ભાજપનો ડમી ઉમેદવાર હતો

   22મી ઓગસ્ટે ચકાસણી દરમિયાન અપક્ષ ઉમેદવાર બબીતા વાધવાણીનું નામાંકન પત્ર રદ કરવામાં આવ્યું હતું. ભાજપના ડમી ઉમેદવાર સુનિલ કોઠારીએ શુક્રવારે પોતાનું નામાંકન પાછું ખેંચી લીધું હતું. આ પછી રવનીત સિંહ બિટ્ટુને વિજેતા જાહેર કરવામાં આવ્યા હતા.

   રાજસ્થાન વિધાનસભાના મુખ્ય સચિવ અને ચૂંટણી અધિકારી મહાવીર પ્રસાદ શર્માએ મંગળવારે બિટ્ટુના અધિકૃત ચૂંટણી એજન્ટ યોગેન્દ્ર સિંહ તંવરને પ્રમાણપત્ર આપ્યું હતું. વિપક્ષ કોંગ્રેસે પેટાચૂંટણીમાં પોતાનો ઉમેદવાર નહીં ઉતારવાનો નિર્ણય લીધો હતો.  

    લોકસભા ચૂંટણી જીત્યા બાદ કોંગ્રેસના કેસી વેણુગોપાલે રાજ્યસભાના સાંસદ પદ પરથી રાજીનામું આપ્યા બાદ આ ચૂંટણી થઈ હતી. રાજસ્થાનની આ બેઠક પર સભ્યપદનો કાર્યકાળ 21 જૂન 2026 સુધી રહેશે. રાજસ્થાનમાં રાજ્યસભાની કુલ 10 બેઠકો છે. બિટ્ટુની ચૂંટણી બાદ હવે ભાજપ અને કોંગ્રેસ પાસે પાંચ-પાંચ રાજ્યસભા સભ્યો છે.

   હરિયાણામાં કિરણ ચૌધરી, ઉપેન્દ્ર કુશવાહા, બિહારમાં મનન મિશ્રા અને મધ્યપ્રદેશમાંથી બીજેપી નેતા જ્યોર્જ કુરિયન બિનહરીફ ચૂંટણી જીત્યા છે. દરેકને ચૂંટણી પ્રમાણપત્રો મળ્યા છે. નવ રાજ્યોમાં રાજ્યસભાની કુલ 12 બેઠકો પર 3 સપ્ટેમ્બરે પેટાચૂંટણી યોજાવાની છે. આસામ, મહારાષ્ટ્ર અને બિહારમાં બે-બે અને હરિયાણા, મધ્યપ્રદેશ, ત્રિપુરા, રાજસ્થાન, ઓડિશા અને તેલંગાણામાં એક-એક બેઠક પર ચૂંટણી યોજાવાની છે.