વિશ્વભરના ૬૦% લોકો પાસે શુધ્ધ પાણી નથી બિમારીઓ વધી છે : આરોગ્યને અસર
સર્વેમાં સામેલ ૧ લાખથી વધુ લોકોએ આશંકા વ્યક્ત કરી હતી કે તેમને સ્થાનિક સંસાધનોમાંથી આપવામાં આવતું પાણી સ્વચ્છ અને સલામત નથી. સર્વેમાં સામેલ ૬૦ ટકાથી વધુ લોકોએ કહ્યું કે પાણી પીવાથી તેમની તબિયત બગડી છે : જ્યારે લોકો તેમના નળના પાણી પર વિશ્વાસ કરતા નથી ત્યારે તેઓ બોટલનું પાણી ખરીદે છે : બોટલનું પાણી માત્ર ખૂબ મોંઘુ નથી પણ પર્યાવરણ માટે હાનિકારક : પ્લાસ્ટિક બોટલો પ્રદૂષણ અને ગ્લોબલ વોર્મિંગમાં વધારો કરે છે
નવી દિલ્હી તા. ૩૦ : વિશ્વભરના લગભગ ૬૦ ટકા લોકો એ હકીકતથી ચિંતિત છે કે તેઓને પીવાનું શુદ્ધ પાણી નથી મળતું. તેનાથી તેમના સ્વાસ્થ્ય પર અસર થઈ રહી છે અને તેમને બીમારીઓ થઈ રહી છે. આ અંગે કરવામાં આવેલા સર્વેમાં લોકો પાસેથી જાણવાનો પ્રયાસ કરવામાં આવ્યો હતો કે તેઓ તેમના પીવાના પાણીને કેટલું સ્વચ્છ અને સલામત માને છે.
ચેપલ હિલ ખાતે નોર્થવેસ્ટર્ન યુનિવર્સિટી અને યુનિવર્સિટી ઓફ નોર્થ કેરોલિનાના આરોગ્ય નિષ્ણાતોના અભ્યાસમાં જણાવાયું છે કે જયારે લોકો તેમના નળના પાણી પર વિશ્વાસ કરતા નથી ત્યારે તેઓ બોટલનું પાણી ખરીદે છે. બોટલનું પાણી માત્ર ખૂબ મોંઘું નથી પણ પર્યાવરણ માટે હાનિકારક પણ છે, કારણ કે તેની બોટલો પ્રદૂષણ અને ગ્લોબલ વોર્મિંગમાં વધારો કરે છે. આ અભ્યાસના પરિણામો નેચર કોમ્યુનિકેશન જર્નલમાં પ્રકાશિત કરવામાં આવ્યા છે.
આ સર્વેક્ષણ રિપોર્ટ ૨૦૧૯માં લોયડ્સ રજિસ્ટર ફાઉન્ડેશન વર્લ્ડ રિસ્ક પોલમાં ૧૪૧ દેશોના ૧,૪૮,૫૮૫ પુખ્ત વયના લોકોના ડેટાનો ઉપયોગ કરીને તૈયાર કરવામાં આવ્યો છે. સંશોધકોને પાણીના પુરવઠા અને તેના નુકશાનના કારણો વચ્ચે મોટો તફાવત જોવા મળ્યો. આ તફાવત ઝામ્બિયામાં સૌથી વધુ હતો, સિંગાપોરમાં સૌથી ઓછો અને એકંદર સરેરાશ ૫૨.૩ ટકા હતો.વિશ્વભરમાં દર વર્ષે લગભગ ૨.૭ મિલિયન ટન પ્લાસ્ટિક પાણીની બોટલોમાં વપરાય છે. બાટલીમાં ભરેલા પાણીને બજારમાં પરિવહન કરવાથી વાયુ પ્રદૂષણ અને કાર્બન ડાયોક્સાઇડ ઉત્સર્જન થાય છે જે ગ્લોબલ વોર્મિંગમાં ફાળો આપે છે. આ ઉપરાંત, લોકો સોડા અથવા અન્ય ખાંડયુક્ત પીણાં પીવે છે જે દાંત અને શરીર માટે હાનિકારક છે. સર્વેમાં સામેલ એક લાખથી વધુ લોકોએ આશંકા વ્યક્ત કરી હતી કે તેમને સ્થાનિક સંસાધનોમાંથી આપવામાં આવતું પાણી સ્વચ્છ અને સલામત નથી. સર્વેમાં સામેલ ૬૦ ટકાથી વધુ લોકોએ કહ્યું કે પાણી પીવાથી તેમની તબિયત બગડી છે. આ અંગે તેમણે તબીબી દસ્તાવેજો પણ રજૂ કર્યા હતા. પીવાના પાણીને કારણે સ્વાસ્થ્ય સમસ્યાઓનો સામનો કરનારાઓમાં ૭૨ ટકા બાળકો અને વૃદ્ધો હતા. દૂષિત પીવાના પાણીને કારણે લગભગ ૬૮ ટકા મહિલાઓના સ્વાસ્થ્ય પર પ્રતિકૂળ અસર થઈ હતી.
(11:10 AM IST)
છેલ્લા 8 દિવસમાં સૌથી લોકપ્રિય 
