તા. ૨૧ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૨ શનિવાર
News of Friday, 20th September 2024
નરેન્દ્રભાઇ નવમી વખત અમેરિકાની મુલાકાત લેશે પીએમ મોદી તા. ર૧ થી ર૩ યુએસના પ્રવાસે
દેશના કુલ ૯ વડાપ્રધાનો યુએસએ જઇ ચૂકયા છેઃ પૂર્વ પીએમ અને નરેન્દ્રભાઇએ ૮-૮ વખત યુએસ પ્રવાસ કર્યો

નવી દિલ્હી, ૨૦: વડાપ્રધાન નરેન્દ્રભાઇ મોદી ફરી એકવાર અમેરિકાના પ્રવાસે જવાના છે. પીએમ તરીકે તેઓ અત્યાર સુધીમાં ૮ વખત અમેરિકાની મુલાકાત લઈ ચૂકયા છે અને હવે તેઓ તેમની નવમી મુલાકાત લેવાના છે. વિદેશ મંત્રાલય (MEA) એ મંગળવારે માહિતી આપી છે કે વડાપ્રધાન મોદી ૨૧ થી ૨૩ સપ્ટેમ્બર સુધી અમેરિકાના પ્રવાસે છે. આ દરમિયાન વડાપ્રધાન મોદી ૨૧ સપ્ટેમ્બરે ડેલાવેરના વિલ્મિંગ્ટનમાં આયોજિત ક્વોડ લીડર્સની ચોથી સમિટમાં ભાગ લેશે. આ કોન્ફરન્સનું આયોજન અમેરિકી રાષ્ટ્રપતિ જો બિડેન કરશે.
પીએમ મોદીની આ મુલાકાત વચ્ચે ભારતીય વડાપ્રધાનોના ઈતિહાસ પર નજર કરીએ તો પીએમ જવાહરલાલ નેહરુ તેમના કાર્યકાળ દરમિયાન ૪ વખત અમેરિકા ગયા હતા. મોદી અને તેમના પુરોગામી મનમોહન સિંહ સહિત કુલ ૯ ભારતીય વડા પ્રધાનો અત્યાર સુધીમાં સત્તાવાર રીતે યુએસની મુલાકાતે ગયા છે. પૂર્વ પીએમ મનમોહન સિંહ ૮ વખત અમેરિકા ગયા હતા સાથે જ અટલ બિહારી વાજપેયી પણ ચાર વખત અમેરિકા જઈ ચુકયા છે. આ સિવાય ઈન્દિરા ગાંધી અને રાજીવ ગાંધી ૩ વખત, પી.વી. નરસિમ્હા રાવ ૨ વખત, અને મોરારજી દેસાઈ અને આઈ.કે. ગુજરાલ એક વખત અમેરિકાની મુલાકાતે ગયા છે.
પીએમ નેહરુએ તેમની અમેરિકા મુલાકાત દરમિયાન રાજદ્વારી અને આર્થિક સંબંધોને ગાઢ બનાવ્યા છે. આ સમયગાળા દરમિયાન ભારતે બિનજોડાણ અપનાવ્યું હતું અને શીત યુદ્ધનો સમયગાળો ચાલી રહ્યો હતો. પીએમ નેહરુએ અમેરિકા સાથે સંતુલન જાળવી રાખ્યું હતું. વર્ષ ૧૯૬૦માં તેમણે યુએન જનરલ એસેમ્બલીને સંબોધન કર્યું હતું.
ભૂતપૂર્વ વડા પ્રધાન અટલ બિહારી વાજપેયી એકમાત્ર વિદેશી નેતા હતા જેમણે ૧૦૬માં યુએસ કોંગ્રેસના સંયુક્ત સત્રને સંબોધિત કર્યું હતું. તેમનું સંબોધન ઐતિહાસિક માનવામાં આવે છે, કારણ કે ભાગ્યે જ કોઈ વિદેશી નેતાને આવું સન્માન મળ્યું હોય. વાજપેયીના નિવેદને ભારત-અમેરિકા સંબંધોને નવી દિશા આપી અને બંને દેશો વચ્ચે મજબૂત ભાગીદારીનો પાયો નાખ્યો હતો.
પીએમ મનમોહન સિંહની મુલાકાત ઘણી બાબતોમાં ખાસ રહી. તેમણે તેમના અમેરિકન પ્રવાસ પર સંયુક્ત રાષ્ટ્ર મહાસભાના ૫૯મા સત્રમાં ભાગ લીધો હતો અને મહાસભાને સંબોધિત કરી હતી. યુએસ પ્રમુખ જ્યોર્જ ડબલ્યુ.બુશ અને યુએન સેક્રેટરી જનરલ કોફી અન્નાન, અફઘાન પ્રમુખ હામિદ કરઝાઈ, પાકિસ્તાની રાષ્ટ્રપતિ પરવેઝ મુશર્રફ અને અન્ય સહભાગી નેતાઓ સાથે બહુપક્ષીય વાટાઘાટો કરી. આ સાથે જી-૪ દેશોના નેતાઓ સાથે પણ વાત કરી હતી. તેઓ અમેરિકાની સરકારી મુલાકાતે પણ ગયા હતા.
(3:20 PM IST)









છેલ્લા 8 દિવસમાં સૌથી લોકપ્રિય 
