<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 21st September 2024

TTD પ્રસાદ વિવાદ:અમૂલે કહ્યું- તિરુપતિ મંદિરમાં ક્યારેય ઘી સપ્લાય કર્યું નથી

ઘણા સોશિયલ મીડિયા યુઝર્સે દાવો કર્યો હતો કે મંદિરે કર્ણાટકમાંથી નંદિની ઘી ખરીદવાનું બંધ કર્યા પછી, તેઓએ અમૂલ ઘી ખરીદવાનું શરૂ કર્યું હતું

તિરુપતિ મંદિરના પ્રખ્યાત લાડુ બનાવવા માટે વપરાતા ઘીમાં પ્રાણીની ચરબી અને માછલીના તેલની હાજરીના વિવાદ વચ્ચે ડેરી જાયન્ટ અમૂલે કહ્યું કે તેણે ક્યારેય મંદિરને ઘી સપ્લાય કર્યું નથી. ઘણા સોશિયલ મીડિયા યુઝર્સે દાવો કર્યો હતો કે મંદિરે કર્ણાટકમાંથી નંદિની ઘી ખરીદવાનું બંધ કર્યા પછી, તેઓએ અમૂલ ઘી ખરીદવાનું શરૂ કર્યું અને અમૂલ દ્વારા પૂરા પાડવામાં આવતા ઘીમાં ભેળસેળ જોવા મળી.

જેના કારણે હવે અમૂલે ટ્વિટ કરીને સ્પષ્ટતા કરી છે.

એક નિવેદનમાં, કંપનીએ જણાવ્યું હતું કે, આ કેટલીક સોશિયલ મીડિયા પોસ્ટના સંદર્ભમાં છે જેમાં ઉલ્લેખ કરવામાં આવ્યો છે કે અમૂલ ઘી તિરુમાલા તિરુપતિ દેવસ્થાનમ (TTD)ને સપ્લાય કરવામાં આવી રહ્યું હતું. અમે જણાવવા ઈચ્છીએ છીએ કે અમે ક્યારેય TTD ને અમૂલ ઘી સપ્લાય કર્યું નથી.

વધુમાં ઉમેર્યું હતું કે, અમે એ પણ સ્પષ્ટ કરવા ઈચ્છીએ છીએ કે અમૂલ ઘી અમારી અત્યાધુનિક ઉત્પાદન સુવિધાઓ પર દૂધમાંથી બનાવવામાં આવે છે જે ISO પ્રમાણિત છે. અમૂલ ઘી ઉચ્ચ ગુણવત્તાની 'પ્યોર મિલ્ક ફેટ'માંથી બનાવવામાં આવે છે. અમારી ડેરીઓમાં મળતું દૂધ FSSAIની કડક ગુણવત્તાની તપાસમાંથી પસાર થાય છે.

અગ્રણી ડેરી બ્રાન્ડે વધુમાં જણાવ્યું હતું કે, અમૂલ વિરુદ્ધ આ ખોટી માહિતીના અભિયાનને રોકવા માટે આ પોસ્ટ જારી કરવામાં આવી રહી છે.

(12:17 AM IST)