નવી દિલ્હી : કેન્દ્રીય ખાદ્ય મંત્રી પ્રહલાદ જોશીએ  કહ્યું છે કે સરકાર ખાંડની લઘુત્તમ વેચાણ કિંમત વધારવાના પ્રસ્તાવ પર વિચાર કરી રહી છે. ફેબ્રુઆરી 2019 થી આ દર 31 રૂપિયા પ્રતિ કિલો પર યથાવત છે.

આગામી તહેવારોની સીઝન દરમિયાન સામાન્ય લોકો માટે મીઠાઈ મોંઘી થઈ શકે છે કારણ કે સરકાર ખાંડની લઘુત્તમ વેચાણ કિંમત એટલે કે એમએસપી વધારવાનું વિચારી રહી છે. ખાદ્ય મંત્રી પ્રહલાદ જોશીએ ગુરુવારે જણાવ્યું હતું કે સરકાર 2024-25 સત્ર માટે ઇથેનોલની કિંમત અને ખાંડની લઘુત્તમ વેચાણ કિંમત વધારવા પર વિચાર કરી રહી છે.

તેમણે કહ્યું કે ઇથેનોલની કિંમત વધારવાનો પ્રસ્તાવ સરકાર સાથે વિચારાધીન છે અને પેટ્રોલિયમ મંત્રાલય આ મામલાની તપાસ કરી રહ્યું છે. એક કાર્યક્રમ દરમિયાન પત્રકારો સાથે વાત કરતા તેમણે કહ્યું કે સરકાર ખાંડની લઘુત્તમ વેચાણ કિંમત વધારવાના પ્રસ્તાવ પર વિચાર કરી રહી છે. જે ફેબ્રુઆરી 2019માં 31 રૂપિયા પ્રતિ કિલોના નિર્ધારિત દરે યથાવત છે.

તેમણે એમ પણ કહ્યું કે સારા ચોમાસાને કારણે 2024-25ની સિઝન (ઓક્ટોબર-સપ્ટેમ્બર)માં ખાંડનું ઉત્પાદન વધુ સારું લાગે છે. ઇથેનોલ સપ્લાય વર્ષ 2022-23 (નવેમ્બર-ઓક્ટોબર) થી સરકાર દ્વારા નિર્ધારિત ઇથેનોલના ભાવમાં વધારો કરવામાં આવ્યો નથી. હાલમાં શેરડીના રસમાંથી ઉત્પાદિત ઇથેનોલની કિંમત પ્રતિ લિટર રૂ. 65.61 છે, જ્યારે બી-હેવી અને સી-હેવી મોલાસીસમાંથી ઉત્પાદિત ઇથેનોલની કિંમત અનુક્રમે રૂ. 60.73 પ્રતિ લિટર અને રૂ. 56.28 પ્રતિ લિટર છે.