હરિયાણા વિધાનસભા ચૂંટણી માટે શનિવારે મતદાન પૂર્ણ થયું. મતદાન બાદ વિવિધ એક્ઝિટ પોલમાં કોંગ્રેસની સરકાર બનાવવાના દાવા કરવામાં આવી રહ્યા છે. હરિયાણા ચૂંટણીના એક્ઝિટ પોલ બાદ પૂર્વ મુખ્યમંત્રી ભૂપેન્દ્ર સિંહ હુડ્ડાનું નિવેદન સામે આવ્યું છે.

   તેમણે દાવો કર્યો છે કે હરિયાણામાં તેમની પાર્ટી પૂર્ણ બહુમતી સાથે સરકાર બનાવશે, પરંતુ સાથે જ તેમણે કહ્યું કે મુખ્યપ્રધાનના ચહેરા અંગેનો નિર્ણય કોંગ્રેસ વિધાનસભાના નિર્ણયના આધારે હાઈકમાન્ડ દ્વારા લેવામાં આવશે.

   રાજ્યમાં છેલ્લા 10 વર્ષથી ભાજપનું શાસન છે અને કોંગ્રેસ આ વિધાનસભા ચૂંટણીમાં સત્તામાં પાછા ફરવાનો પ્રયાસ કરી રહી છે. એક્ઝિટ પોલ પણ કોંગ્રેસના શાસન તરફ ઈશારો કરી રહ્યા છે, પરંતુ 8મી ઓક્ટોબરે ચૂંટણીના પરિણામો જ નક્કી કરશે કે કોની સરકાર બનશે.

  પૂર્વ મુખ્યમંત્રી ભૂપેન્દ્ર સિંહ હુડ્ડા (77)એ રોહતકમાં તેમના નિવાસસ્થાને મીડિયા સાથે વાત કરતા કહ્યું કે તેઓ પૂર્ણ બહુમત સાથે સરકાર બનાવી રહ્યા છે. લોકોએ કોંગ્રેસની સરકાર બનાવવાનો નિર્ણય કર્યો છે.

   જો કોંગ્રેસ સત્તામાં આવશે તો મુખ્યમંત્રી કોણ હશે તેવા પ્રશ્નના જવાબમાં હુડ્ડાએ કહ્યું કે કોંગ્રેસમાં એક નિર્ધારિત પ્રક્રિયા છે, જે મુજબ ચૂંટણી પરિણામો પછી પક્ષના ધારાસભ્યોનો અભિપ્રાય લેવામાં આવશે. તેના આધારે હાઈકમાન્ડ નિર્ણય લેશે. 

   કુમારી સેલજા અને રણદીપ સિંહ સુરજેવાલાના મુખ્યમંત્રી પદના દાવા અંગેના પ્રશ્નના જવાબમાં હુડ્ડાએ કહ્યું કે રાજકારણમાં કોઈપણ વ્યક્તિની આકાંક્ષાઓ હોઈ શકે છે, પરંતુ કોંગ્રેસમાં મુખ્યમંત્રી પદ માટે પસંદગી માટેની પ્રક્રિયા છે. તે પ્રક્રિયા મુજબ ધારાસભ્ય દળની બેઠકમાં ધારાસભ્યો પોતાનો અભિપ્રાય આપશે અને ત્યારબાદ હાઈકમાન્ડ નિર્ણય લેશે.

  ભાજપના નેતાઓના સત્તામાં આવવાના દાવાઓ પર કટાક્ષ કરતા હુડ્ડાએ કહ્યું કે બીજેપી બીજું શું કહેશે? પરિણામ આવ્યા પછી ખબર પડશે.

    હુડ્ડાએ ભાજપ સરકાર પર પ્રહારો કર્યા છે. તેમણે કહ્યું કે હરિયાણામાં ભાજપની આગેવાનીવાળી સરકાર સંપૂર્ણપણે નિષ્ક્રિય છે. ગરીબો, મજૂરો, ખેડૂતો, કર્મચારીઓ, મહિલાઓ અને યુવાનો તમામ ભાજપ સરકારથી કંટાળી ગયા છે

    હુડ્ડાએ કહ્યું કે, એક સમયે હરિયાણા માથાદીઠ આવક, રોકાણ અને વિવિધ ક્ષેત્રોમાં નંબર વન રાજ્ય હતું, પરંતુ હવે રાજ્યની હાલત ખરાબ થઈ ગઈ છે. રાજ્ય હવે બેરોજગારીની બાબતમાં નંબર વન છે. ડ્રગ્સે યુવાનોને પોતાની ઝપેટમાં લીધા છે.

  કોંગ્રેસના દિગ્ગજ નેતા અને બે વખતના મુખ્યમંત્રી ભૂપેન્દ્ર સિંહ હુડ્ડા રોહતક જિલ્લાના ગઢી સાંપલા-કિલોઈથી ચૂંટણી લડી રહ્યા છે. રાજ્યની તમામ 90 વિધાનસભા બેઠકો માટે શનિવારે મતદાન થયું હતું.