ભારતની સ્ટાર જિમ્નાસ્ટ દીપા કર્માકરે સોમવારે રમતગમતમાંથી નિવૃત્તિ લેવાની જાહેરાત કરી હતી. 2016ના રિયો ઓલિમ્પિકમાં દીપાએ પ્રભાવશાળી પ્રદર્શન કર્યું હતું, પરંતુ તે કાંસ્ય ચંદ્રક ઘણાં જ ઓછા માર્જિનથી ચૂકી ગઈ હતી. 31 વર્ષીય દીપા, જે ઓલિમ્પિકમાં ભાગ લેનારી ભારતની પ્રથમ મહિલા જિમ્નાસ્ટ બની હતી, તે રિયો ઓલિમ્પિકની વોલ્ટ ઈવેન્ટમાં ચોથા સ્થાને રહી હતી અને માત્ર 0.15 પોઈન્ટથી બ્રોન્ઝ મેડલ જીતવામાં ચૂકી ગઈ હતી.

દીપાએ એક નિવેદનમાં કહ્યું કે, ખૂબ વિચાર અને ચિંતન બાદ મેં સ્પર્ધાત્મક જિમ્નેસ્ટિક્સમાંથી નિવૃત્તિ લેવાનો નિર્ણય કર્યો છે. આ એક સરળ નિર્ણય નથી પરંતુ મને લાગે છે કે આ યોગ્ય સમય છે. જ્યાં સુધી મને યાદ છે ત્યાં સુધી જિમ્નેસ્ટિક્સ મારા જીવનનું કેન્દ્ર રહ્યું છે અને હું ચઢાવ-ઉતાર અને વચ્ચેની દરેક ક્ષણ માટે આભારી છું.

તેણે લખ્યું, મને યાદ છે કે પાંચ વર્ષની દીપા જેને કહેવામાં આવ્યું હતું કે તેના સપાટ પગના કારણે તે ક્યારેય જિમ્નાસ્ટ બની શકશે નહીં. આજે હું મારી સિદ્ધિઓ જોઈને ગર્વ અનુભવું છું. વિશ્વ સ્તરે ભારતનું પ્રતિનિધિત્વ કરવું અને મેડલ જીતવું, ખાસ કરીને રિયો ઓલિમ્પિકમાં પ્રોદુનોવા વોલ્ટનું પ્રદર્શન કરવું એ મારી કારકિર્દીની સૌથી યાદગાર ક્ષણ રહી છે.

દીપાએ આગળ લખ્યું, આજે હું તે દીપાને જોઈને ખૂબ જ ખુશ છું કારણ કે તેનામાં સપના જોવાની હિંમત હતી. મારી છેલ્લી જીત તાશ્કંદમાં એશિયન જિમ્નેસ્ટિક્સ ચૅમ્પિયનશિપ હતી જે એક ટર્નિંગ પૉઇન્ટ હતી, કારણ કે ત્યાં સુધીમાં મને લાગ્યું કે હું મારા શરીરને વધુ આગળ વધારી શકીશ. પરંતુ ક્યારેક આપણું શરીર કહે છે કે આરામ કરવાનો સમય આવી ગયો છે. પણ હૃદય હજી પણ સહમત નથી.

ઓલિમ્પિયન દીપાએ કહ્યું, હું મારા કોચ બિશ્વર નંદી સર અને સોમા મેડમનો આભાર માનું છું, જેમણે છેલ્લા 25 વર્ષથી મને માર્ગદર્શન આપ્યું છે અને મારી સૌથી મોટી તાકાત છે. મને મળેલા સમર્થન માટે હું ત્રિપુરા સરકાર, જિમ્નેસ્ટિક્સ ફેડરેશન, સ્પોર્ટ્સ ઓથોરિટી ઓફ ઈન્ડિયા અને અન્ય લોકોનો આભાર વ્યક્ત કરવા માંગુ છું. છેલ્લે મારા પરિવારને જેઓ મારા સારા અને ખરાબ દિવસોમાં હંમેશા મારી સાથે હતા.

દીપાએ લખ્યું, ભલે હું નિવૃત્ત થઈ રહી છું, પરંતુ જિમ્નાસ્ટિક્સ સાથેનો મારો સંબંધ ક્યારેય નહીં તૂટે. હું ઈચ્છું છું કે હું રમતને કંઈક પાછું આપી શકું. કદાચ માર્ગદર્શક, કોચ, મારા જેવી અન્ય છોકરીઓને સમર્થન આપીને. ફરી એકવાર મારી યાત્રાનો હિસ્સો બનવા માટે દરેકનો આભાર.