નવી દિલ્હી : આંતરરાષ્ટ્રીય વૈજ્ઞાનિકોની ટીમે વિશ્વને ચેતવણી આપી છે. તેમનું કહેવું છે કે ભવિષ્યમાં એક ગંભીર આબોહવાની આપત્તિ આવી શકે છે, જેમાંથી બહાર આવવું ખૂબ મુશ્કેલ હશે. દર વર્ષે આબોહવા પરિવર્તન પર નજર રાખતા 35 પરિમાણોમાંથી 25 રેકોર્ડ સ્તરે પહોંચી ગયા છે, જેના કારણે પૃથ્વી પર જીવનનું અસ્તિત્વ જોખમમાં આવી શકે છે.

  વૈજ્ઞાનિકોનું આ સંશોધન બાયોસાયન્સ નામની જર્નલમાં પ્રકાશિત થયું છે, જેમાં હવામાનમાં થતા બદલાવને કારણે વારંવાર પ્રતિકૂળ હવામાનની ઘટનાઓ અને તેની વધતી તીવ્રતા પર ભાર મૂકવામાં આવ્યો છે.

   રિપોર્ટમાં કહેવામાં આવ્યું છે કે અશ્મિભૂત ઇંધણમાંથી ઉત્સર્જન અત્યાર સુધીના સર્વોચ્ચ સ્તરે પહોંચી ગયું છે. આ આંતરરાષ્ટ્રીય ટીમમાં જર્મનીની પોટ્સડેમ ઈન્સ્ટિટ્યૂટ ઓફ ક્લાઈમેટ ઈમ્પેક્ટ રિસર્ચના સંશોધકો પણ સામેલ હતા. કારણ શું છે? 

     અન્ય મહત્વના સૂચકાંકોમાં પૃથ્વીની સપાટીનું સરેરાશ તાપમાન, મહાસાગરોનું ઉષ્ણતામાન, વૈશ્વિક સમુદ્રનું સ્તર અને વધતી જતી માનવ વસ્તીનો સમાવેશ થાય છે. આ તમામ રેકોર્ડ સ્તરે પહોંચી ગયા છે, અને પૃથ્વીની માનવ વસ્તી દરરોજ લગભગ 2 લાખના દરે વધી રહી છે. વૈજ્ઞાનિકોએ ચેતવણી આપી છે કે ગ્રીનલેન્ડ અને એન્ટાર્કટિકાના બરફનું સ્તર અને જાડાઈ અભૂતપૂર્વ દરે ઘટી રહી છે. 

   આ ઉપરાંત મિથેન અને નાઈટ્રસ ઓક્સાઈડ જેવા ગ્રીનહાઉસ વાયુઓનું ઉત્સર્જન પણ રેકોર્ડ સ્તરે પહોંચી ગયું છે. 1980 અને 2020 ની વચ્ચે નાઈટ્રસ ઓક્સાઈડના સ્તરમાં લગભગ 40 ટકાનો વધારો થયો છે

 2022 ની સરખામણીમાં 2023 માં કોલસો, તેલ અને ગેસનો વપરાશ 1.5 ટકા વધ્યો છે, જ્યારે અશ્મિભૂત ઇંધણનો ઉપયોગ સૌર અને પવન ઊર્જા કરતાં લગભગ 15 ગણો વધારે છે. વૈજ્ઞાનિકોની ટીમે ભારપૂર્વક જણાવ્યું છે કે જો તાત્કાલિક નક્કર પગલાં લેવામાં નહીં આવે તો વિશ્વને બદલી ન શકાય તેવી આબોહવા આપત્તિનો સામનો કરવો પડી શકે છે.