મુંબઈ :પ્રખ્યાત ફિલ્મ નિર્માતા અને બાળા સાહેબ ઠાકરેની પુત્રવધૂ સ્મિતા ઠાકરેને મહારાષ્ટ્રની શિંદે સરકારે મહત્વની જવાબદારી સોંપી છે. મહારાષ્ટ્ર સરકારના સાંસ્કૃતિક મંત્રાલયે એક મહત્વપૂર્ણ નિર્ણય લેતા ફિલ્મ નીતિ સમિતિની રચના કરી છે. મહત્વની વાત એ છે કે આ ફિલ્મ નીતિ સમિતિના અધ્યક્ષ તરીકે સ્મિતા ઠાકરેની નિમણૂક કરવામાં આવી છે.

    સ્મિતા ઠાકરે શિવસેનાના સ્થાપક દિવંગત બાળા સાહેબ ઠાકરેના પુત્રવધૂ છે. તેણીના લગ્ન બાળા સાહેબના પુત્ર જયદેવ ઠાકરે સાથે થયા હતા. જોકે બંનેના છૂટાછેડા થઈ ગયા છે. તે મરાઠી અને હિન્દી ફિલ્મો તેમજ શિક્ષણ અને આરોગ્ય ક્ષેત્રે ઘણું કામ કરે છે.

  મહારાષ્ટ્રમાં વિધાનસભા ચૂંટણી યોજાવાની છે અને વિધાનસભા ચૂંટણીને લઈને હોબાળો ચાલી રહ્યો છે. ચૂંટણી પહેલા શિંદે સરકારે ગુરુવારે કેબિનેટની બેઠકમાં ઘણા મહત્વપૂર્ણ નિર્ણયો લીધા છે. તેમાં પણ આ નિર્ણય લેવામાં આવ્યો છે.

   સ્મિતા ઠાકરે શિવસેના (UBT) પ્રમુખ ઉદ્ધવ ઠાકરેની ભાભી છે. શિંદે સરકારનો આ નિર્ણય ઉદ્ધવ પરિવાર માટે પીડાદાયક હોઈ શકે છે. આનાથી એકનાથ શિંદે અને ઉદ્ધવ ઠાકરે વચ્ચેનો વિવાદ વધુ વધી શકે છે. 

   સ્મિતા દાયકાઓથી ઠાકરે પરિવાર સાથે ઝઘડો કરે છે અને અલગ રહે છે. તે ફિલ્મ નિર્માતા અને દિગ્દર્શક પણ રહી ચુકી છે. હિન્દી અને મરાઠી ફિલ્મો પણ કરી છે. તેને ઈન્ડસ્ટ્રીમાં મોટું નામ માનવામાં આવે છે 

  આ કમિટી કોઈપણ પ્લેટફોર્મ માટે બનવાની ફિલ્મના વિકાસથી લઈને તેની નીતિ બનાવવામાં કોઈપણ પ્રકારની મદદ પૂરી પાડવા માટે ઉપયોગી થશે. આ સમિતિમાં કુલ 22 લોકો હશે. ટિપ્સ ઈન્ડસ્ટ્રીઝ સાથે જોડાયેલા રમેશ તૌરાનીને પણ આ કમિટીમાં સામેલ કરવામાં આવ્યા છે. આ સમિતિ સાંસ્કૃતિક મંત્રાલય હેઠળ કામ કરશે. 

  મહારાષ્ટ્રના વર્તમાન સીએમ એકનાથ શિંદે ઉદ્ધવ ઠાકરેના ખૂબ જ નજીક હતા અને તેમની પાર્ટીમાં હતા, પરંતુ તેમણે ઉદ્ધવ ઠાકરેને છોડીને બીજેપીને સમર્થન આપ્યું અને એનસીપી નેતા અજિત પવાર સાથે મળીને સરકાર બનાવી. 

    મહારાષ્ટ્રમાં અત્યારે ઉદ્ધવ ઠાકરે અને એકનાથ શિંદે વચ્ચે રાજકીય લડાઈ ચરમસીમાએ છે. આવી સ્થિતિમાં વિધાનસભા ચૂંટણી પહેલા એકનાથ શિંદેએ સ્મિતા ઠાકરેને નવી જવાબદારી આપીને ઉદ્ધવ ઠાકરે પર નિશાન સાધ્યું છે.