નવી દિલ્‍હી, તા.૧૧: ભારતીય રૂપિયો આજે અમેરિકી ડોલર સામે સર્વકાલીન નીચલા સ્‍તરે પહોંચી ગયો છે. ક્રૂડ ઓઈલના ભાવમાં તાજેતરમાં વધારો અને શેરબજારમાં વિદેશી રોકાણકારોની ભારે વેચવાલીથી રૂપિયા પર દબાણ જોવા મળ્‍યું છે. રોઇટર્સના અહેવાલ મુજબ શુક્રવારે ડોલર સામે રૂપિયો ઘટીને ૮૩.૯૯૦૦ થયો હતો. અગાઉ તેની સર્વકાલીન નીચી સપાટી ૮૩.૯૮૫૦ હતી. ૧૨ સપ્‍ટેમ્‍બરે રૂપિયો આ સ્‍તરે પહોંચ્‍યો હતો. જો કે શરૂઆતના વેપારમાં તે બે પૈસા મજબૂત થયો હતો પરંતુ દિવસ આગળ વધતો ગયો તેમ તેમાં ઘટાડો થયો હતો.

વૈશ્વિક બજારોમાં યુએસ ડોલરના નબળા વલણ વચ્‍ચે શુક્રવારે શરૂઆતના વેપારમાં યુએસ ડોલર સામે રૂપિયો ૨ પૈસા વધીને ૮૩.૯૬ પર પહોંચ્‍યો હતો. ફોરેક્‍સ ટ્રેડર્સે જણાવ્‍યું હતું કે ક્રૂડ ઓઈલના ભાવમાં વધારો અને વિદેશી મૂડીના સતત ઉપાડથી સ્‍થાનિક ચલણના લાભને મર્યાદિત કરવામાં આવ્‍યો છે. આ ઉપરાંત સ્‍થાનિક શેરબજારોની નબળા શરૂઆતથી પણ સ્‍થાનિક ચલણ પર દબાણ જોવા મળ્‍યું હતું.

આંતરબેંક વિદેશી વિનિમય બજારમાં, રૂપિયો શરૂઆતના વેપારમાં ડોલર દીઠ ૮૩.૯૭ પર ખૂલ્‍યો હતો અને પછી પ્રારંભિક સોદામાં વધીને ૮૩.૯૬ પ્રતિ ડોલર થયો હતો, જે તેના અગાઉના બંધ ભાવ કરતાં બે પૈસાનો વધારો દર્શાવે છે. ગુરુવારે અમેરિકી ડોલર સામે રૂપિયો ૮૩.૯૮ ના સ્‍તર પર બંધ થયો હતો.

દરમિયાન, ડૉલર ઇન્‍ડેક્‍સ, જે છ મુખ્‍ય કરન્‍સી સામે યુએસ ડૉલરની સ્‍થિતિનું મૂલ્‍યાંકન કરે છે, તે ૦.૧૧ ટકા ઘટીને ૧૦૨.૮૭ પર હતો. આંતરરાષ્‍ટ્રીય સ્‍ટાન્‍ડર્ડ બ્રેન્‍ટ ક્રૂડ ૧.૪૮્રુ વધીને $૭૭.૭૧ પ્રતિ બેરલ પર હતું. શેરબજારના ડેટા અનુસાર, વિદેશી સંસ્‍થાકીય રોકાણકારો (FII) ગુરુવારે વેચનાર હતા અને તેમણે રૂ. ૪,૯૨૬.૬૧ કરોડના શેરનું વેચાણ કર્યું હતું.