નવી દિલ્હી :  સામાન્ય રીતે તહેવારોમાં શાકભાજીના ભાવ મોંઘા હોય છે, પરંતુ આ વર્ષે શાકભાજીના ભાવ જોતા એવું લાગે છે કે અન્ય વર્ષની સરખામણીએ આ વર્ષે તહેવારોની સિઝનમાં ભાવ વધુ છે. ખાસ કરીને દિલ્હી એનસીઆરમાં આ સ્થિતિ જોવા મળી રહી છે. અહીં અન્ય શાકભાજીની સરખામણીમાં ટામેટાંના ભાવ ખૂબ ઊંચા થઈ ગયા છે. રિટેલ માર્કેટમાં હાઇબ્રિડ ટામેટાનો ભાવ 100 થી 120 રૂપિયા પ્રતિ કિલો છે જ્યારે સ્થાનિક ટામેટા 120 થી 140 રૂપિયા પ્રતિ કિલોના ભાવે વેચાઈ રહ્યા છે. આ ઉપરાંત અન્ય શાકભાજીના ભાવમાં પણ વધારો થયો છે.

   દિલ્હીના ગાઝીપુર માર્કેટમાં હાઈબ્રિડ ટામેટાં જથ્થાબંધ ભાવે 50 રૂપિયા પ્રતિ કિલો અને સ્થાનિક ટામેટાં 60 રૂપિયા પ્રતિ કિલોના ભાવે વેચાઈ રહ્યા છે. તેનું કારણ એવું કહેવાય છે કે મુંબઈ, નાશિક, હિમાચલ અને બેંગલુરુમાં ટામેટાંનો મહત્તમ પુરવઠો થઈ રહ્યો છે.

  આ દિવસોમાં દરેક જગ્યાએ વરસાદ અને પૂરની અસર છે, જેના કારણે માલનો સપ્લાય ઘટી રહ્યો છે અને તેની કિંમતો વધી રહી છે. આ ઉપરાંત નવરાત્રીના કારણે ટામેટાંના ભાવમાં પણ વધારો થયો છે. વેપારીઓનું કહેવું છે કે આગામી 2-3 દિવસમાં તેની કિંમતો ઘટી શકે છે. શાકભાજીના સતત વધી રહેલા ભાવને કારણે રસોડાનું બજેટ ખોરવાઈ ગયું છે.