નવી દિલ્હી :સમગ્ર દેશમાં વિજયાદશમીની ઉજવણી કરવામાં આવે છે. કાશ્મીરથી દિલ્હી, બિહારથી મહારાષ્ટ્ર સુધી દશેરાની ઉજવણી કરવામાં આવી રહી છે. અનેક જગ્યાએ રામલીલાનું આયોજન કરવામાં આવી રહ્યું છે અને રાવણના પૂતળા દહન કરવામાં આવી રહ્યા છે. દિલ્હીના લાલ કિલ્લા ખાતે રામલીલામાં રાષ્ટ્રપતિ દ્રૌપદી મુર્મુ અને વડાપ્રધાન મોદી હાજર રહ્યા હતા. મંચ પર જતા પહેલા પીએમ મોદી અને રાષ્ટ્રપતિએ રામ-લક્ષ્મણને તિલક લગાવીને આરતી કરી, ત્યારબાદ તેઓ મંચ પર પહોંચ્યા અને ધનુષ્યમાંથી તીર કાઢીને રાવણના પૂતળાનું દહન કર્યું.

    બીજી તરફ કોંગ્રેસના નેતા અને વિપક્ષના નેતા રાહુલ ગાંધીએ લાલ કિલ્લા પર જ નવ શ્રી ધાર્મિક રામલીલા સમિતિની રામલીલામાં ભાગ લીધો હતો. તેમની સાથે કોંગ્રેસના અન્ય નેતાઓ પણ હાજર હતા. દિલ્હીમાં રાવણ દહનની શરૂઆત સાથે જ દેશભરમાં વિજયાદશમીની ઉજવણી શરૂ થઈ ગઈ હતી. વિવિધ રાજ્યોમાં રામલીલાનું આયોજન કરવામાં આવ્યું હતું અને રાવણના પૂતળાનું દહન કરવામાં આવ્યું હતું. 

    બિહારઃ મુખ્યમંત્રી નીતિશ કુમાર અને નાયબ મુખ્યમંત્રી સમ્રાટ ચૌધરી પટનાના ગાંધી મેદાન પહોંચ્યા હતા. જ્યાં બંને નેતાઓએ રામલીલાનું મંચન જોયું અને પછી ધનુષમાંથી તીર કાઢીને રાવણના પૂતળાનું દહન કર્યું.

   જમ્મુ-કાશ્મીરઃ શ્રીનગરના એસકે સ્ટેડિયમમાં રાવણના 30 ફૂટ ઊંચા પૂતળાનું દહન કરવામાં આવ્યું હતું. પુતળા દહન સમયે મોટી સંખ્યામાં લોકો હાજર રહ્યા હતા. આ પહેલા રામલીલાનું આયોજન કરવામાં આવ્યું હતું. જમ્મુના પરેડ ગ્રાઉન્ડમાં પણ રાવણના પૂતળાનું દહન કરવામાં આવ્યું હતું.

    ઉત્તર પ્રદેશ: વિજયાદશમીના અવસર પર, મુખ્ય પ્રધાન યોગી આદિત્યનાથે ગોરખપુરના રામલીલા મેદાનમાં દશેરાની ઉજવણીમાં ભાગ લેતી વખતે ભગવાન રામ, લક્ષ્મણ અને સીતાની ભૂમિકા ભજવતા કલાકારોના કપાળ પર તિલક લગાવ્યું હતું. 

  પશ્ચિમ બંગાળ: વિજયાદશમી નિમિત્તે બાલીગંગે 21 પલ્લી સર્વજનિન દુર્ગોત્સવ સમિતિ દ્વારા સિંદૂર ખેલનું આયોજન કરવામાં આવ્યું હતું. સિંદૂર ખેલમાં મહિલાઓએ ભાગ લીધો હતો. વિજયાદશમી નિમિત્તે કોલકાતામાં પણ વિવિધ કાર્યક્રમોનું આયોજન કરવામાં આવ્યું હતું. 

     ઝારખંડ: વિજયાદશમીના અવસર પર મુખ્યમંત્રી હેમંત સોરેને રાંચીમાં દશેરા ઉત્સવના કાર્યક્રમમાં ભાગ લીધો હતો. સીએમએ ત્યાં રાવણના પૂતળાનું દહન પણ કર્યું હતું.