નવી દિલ્હી : દિલ્હી સરકાર બાદ હવે ઉપરાજ્યપાલને પણ રાજધાની દિલ્હીમાં વૃક્ષો કાપવાના મામલે ઠપકો આપવામાં આવ્યો છે. આજે સુપ્રીમ કોર્ટે દિલ્હીના લેફ્ટનન્ટ ગવર્નરને દક્ષિણ દિલ્હી સ્થિત રિજ વિસ્તારમાં વૃક્ષો કાપવાના મામલે કોર્ટમાં સોગંદનામું દાખલ કરવા કહ્યું છે. એલજી વિનય સક્સેનાએ ડીડીએને રોડ પહોળો કરવા માટે રિજ વિસ્તારમાં લગભગ 1100 વૃક્ષો કાપવાનો આદેશ આપ્યો હતો

    આ મામલે દિલ્હી સરકાર અને લેફ્ટનન્ટ ગવર્નર વચ્ચે વિવાદ થયો હતો. બંને એકબીજા પર ઝાડ કાપવાનો આરોપ લગાવી રહ્યાં છે. બંને આ મામલે સુપ્રીમ કોર્ટમાં જઈ ચૂક્યા છે. હવે કોર્ટે દિલ્હીના એલજીને આ મામલે એફિડેવિટ દાખલ કરવા કહ્યું છે. 

  દિલ્હીના એલજી ડીડીએના અધ્યક્ષ પણ છે. ડીડીએને રોડ પહોળો કરવા માટે વૃક્ષો કાપવાની પરવાનગી આપવામાં આવી હતી, પરંતુ એવો આરોપ છે કે જે મંજૂરી આપવામાં આવી હતી તેનાથી વધુ વૃક્ષો કાપવામાં આવ્યા છે 

  સુપ્રીમ કોર્ટે આ સ્થળે વૃક્ષો કાપવા પર કેટલીક શરતો લાદી હતી, જેનું ઉલ્લંઘન કરવામાં આવ્યું છે. આ અંગે સુપ્રીમ કોર્ટે એફિડેવિટ દાખલ કરીને એલજીને પૂછ્યું છે કે શું તેમને જાણ કરવામાં આવી હતી કે આ સ્થળે વૃક્ષો કાપવા માટે સુપ્રીમ કોર્ટની પરવાનગી જરૂરી છે? 

  કોર્ટે લેફ્ટનન્ટ ગવર્નરને પૂછ્યું કે આ મામલામાં જવાબદાર અધિકારીઓ સામે શું કાર્યવાહી કરવામાં આવી છે? કોર્ટે કહ્યું કે અમે ઈચ્છીએ છીએ કે ડીડીએ સુપ્રીમ કોર્ટના આદેશની રાહ જોયા વગર તેના જવાબદાર અધિકારીઓ સામે કાર્યવાહી કરે. સુપ્રીમ કોર્ટ આ મામલે પગલાં લે તે પહેલાં એલજી પોતે પગલાં લે તો સારું રહેશે. 

  આ મામલે દિલ્હી સરકાર અને LG વચ્ચે લાંબા સમયથી વિવાદ ચાલી રહ્યો છે. દિલ્હી સરકારનો આરોપ છે કે LGના આદેશ પર વૃક્ષો કાપવામાં આવ્યા હતા, જ્યારે LG વહીવટીતંત્રનો આરોપ છે કે વૃક્ષો દિલ્હી સરકારના આદેશ પર કાપવામાં આવ્યા હતા. 

   બંને એકબીજા પર આરોપ લગાવીને કોર્ટમાં લડી ચૂક્યા છે, જેના માટે સુપ્રીમ કોર્ટે જુલાઈ મહિનામાં બંને પક્ષોને ફટકાર લગાવી હતી. દિલ્હી સરકારનો આરોપ છે કે DDAએ તેને કાપવાની મંજૂરી આપી હતી તેના કરતા વધુ વૃક્ષો કાપ્યા છે.