નવી દિલ્હી: ભારત અને પાકિસ્તાને આગામી પાંચ વર્ષ માટે શ્રી કરતારપુર સાહિબ કોરિડોર પર સમજૂતીનું નવીકરણ કર્યું છે. વિદેશ મંત્રી એસ જયશંકરે આ જાણકારી આપી છે. તેમણે કહ્યું છે કે મોદી સરકાર અમારા શીખ સમુદાયને તેમના પવિત્ર સ્થળો સુધી પહોંચવા માટે સુવિધા આપવાનું ચાલુ રાખશે.

    કરતારપુર સાહિબ ગુરુદ્વારા ગુરુદ્વારા દરબાર સાહિબ તરીકે ઓળખાય છે. શીખો માટે આ એક મહત્વપૂર્ણ ધાર્મિક સ્થળ છે, કારણ કે ગુરુ નાનક દેવે તેમના જીવનના છેલ્લા વર્ષો અહીં વિતાવ્યા હતા. નાનકજીએ અહીં 16 વર્ષ સુધી જીવન વિતાવ્યું. બાદમાં ગુરુ નાનક દેવે આ જ સ્થળે પોતાનો દેહ છોડ્યો હતો. જે બાદ અહીં ગુરુદ્વારા દરબાર સાહિબ બનાવવામાં આવ્યું હતું.

    આ સ્થળ પાકિસ્તાનના પંજાબના નારોવાલ જિલ્લામાં આવે છે. કરતારપુર અહીં આવેલું છે. આ સ્થળ લાહોરથી 120 કિલોમીટર દૂર અને ભારત-પાકિસ્તાન બોર્ડરથી માત્ર ત્રણ કિલોમીટર દૂર છે.

   નવેમ્બર 2023માં પાકિસ્તાનમાં શીખ સમુદાયની ભાવનાઓ સાથે રમતનો મામલો સામે આવ્યો હતો. અહીં કરતારપુર સાહિબ સ્થિત ગુરુદ્વારાને અપમાનિત કરવામાં આવ્યું હતું. કરતારપુર સાહિબના ગુરુદ્વારાના દર્શની દેવરીથી માત્ર 20 ફૂટ દૂર દારૂ અને નોન-વેજ પાર્ટીનું આયોજન કરવામાં આવ્યું હતું. આ પાર્ટીના ઘણા વીડિયો પણ સામે આવ્યા હતા.

  વીડિયોમાં લોકો દારૂના નશામાં જોરશોરથી ડાન્સ કરતા જોવા મળ્યા હતા. પંડાલમાં નોન-વેજ ખાવાનું ટેબલ હતું. પાર્ટીનો વીડિયો સામે આવ્યા બાદ શીખ સમુદાયમાં ભારે રોષ જોવા મળ્યો હતો. આ પાર્ટી પાકિસ્તાનના પ્રોજેક્ટ મેનેજમેન્ટ યુનિટના સીઈઓ મોહમ્મદ અબુ બકર આફતાબ કુરેશીએ આપી હતી

  પાકિસ્તાનના નારોવાલના ડીસી મોહમ્મદ શારુખ પોલીસ અધિકારીઓ સહિત વિવિધ સમુદાયોના 80 થી વધુ લોકો સાથે પાર્ટીમાં હાજરી આપી હતી. પાર્ટીમાં પીળી પાઘડી પહેરેલા શીખ રમેશ સિંહ અરોરા, નારોવાલના ભૂતપૂર્વ MPA અને કરતારપુર કોરિડોરના રાજદૂત પણ હાજર હતા. આટલું જ નહીં કરતારપુર સાહિબના મુખ્ય ગ્રંથી જ્ઞાની ગોવિંદ સિંહ પણ આ પાર્ટીમાં જોડાયા હતા.