નવી દિલ્‍હી, તા.૨૩: સામાન્‍ય રીતે પતિ-પત્‍ની વચ્‍ચેના છૂટાછેડાના કેસમાં પતિ ભરણપોષણ ચૂકવતો હોય છે. જેમાં દર મહિને અથવા તો સમાધાનના ભાગ રૂપે આજીવન ભરણપોષણ તરીકે એક ચોક્કસ રકમ આપવામાં આવતી હોય છે. પરંતુ વડોદરામાં એક છૂટાછેડાના કેસમાં પતિને પત્‍ની દ્વારા ભરણપોષણ આપવામાં આવ્‍યું છે. આ કેસમાં પતિ-પત્‍ની બંને જણા વર્ષોથી અલગ રહેતા હતા. વર્ષો બાદ હવે તેમણે સમંતિથી છૂટાછેડા લેવાનો નિર્ણય લીધો હતો. જેમાં સમાધાના ભાગરૂપે વડોદરાના બિઝનેસ ફેમિલીની મહિલાએ પોતાના ૭૯ વર્ષીય પતિને આજીવન ભરણપોષણ તરીકે ૪૭ લાખ રૂપિયા આપ્‍યા છે.

વડોદરાની ફેમિલી કોર્ટ દ્વારા આ દંપતિની અરજીને માન્‍ય રાખવામાં આવી હતી. પતિ-પત્‍નીએ સાથે મળીને પિટિશન કરી હતી અને કોર્ટે તેને મંજૂર કરી હતી. તેમની પિટિશનની કોપી અમારા સહયોગી ટાઈમ્‍સ ઓફ ઈન્‍ડિયાને મળી હતી. આ પતિ-પત્‍ની વચ્‍ચેના સંબંધો બગડવા પાછળનું એક સૌથી મોટું કારણ નેતિકતા વિશેના તેમના વિરોધાભાસી વિચારો હતો. આ મુદ્દા પર બંનેના વિચારો એકબીજાથી તદ્દન વિપરીત હતા. અરજીમાં કહેવામાં આવ્‍યું હતું કે, અરજદારોમાં ઘણા મતભેદો છે અને નૈતિકતાની મર્યાદાઓ અને ધોરણો સહિતની બાબતો પર બંનેના વિચારો એકબીજાથી તદ્દન અલગ છે.

શરૂઆતમાં પતિએ ત્રણ વર્ષ પહેલાં છૂટાછેડા માટે અરજી કરી હતી, કારણ કે તેઓ ૨૦૦૯થી અલગ રહેતા હતા. જોકે, પતિ-પત્‍ની બિઝનેસમાં ભાગીદાર હતા. તેથી પત્‍નીએ તે શરતે મંજૂરી આપી હતી કે તેઓ બિઝનેસમાંથી પણ અલગ થઈ જાય. કેસના રેકોર્ડ્‍સ પ્રમાણે પત્‍નીએ દાવો કર્યો હતો કે તેના અલગ થવાનો નિર્ણય તેના પતિનો છે અને તેણે પોતાની દીકરીઓના લગ્નની જવાબદારી પણ લીધી ન હતી. અરજીમાં તે પણ નોંધવામાં આવ્‍યું હતું કે બંનેના પરિવારજનો દ્વારા સમાધાનના પ્રયાસો કરવામાં આવ્‍યા હતા પરંતુ તેમને સફળતા મળી ન હતી. છૂટેછાડા માટે બંને સંમત થયા હતા અને પત્‍નીએ આજીવન ભરણપોષણ અને ગુજરાન પેટે પતિને ૪૭ લાખ રૂપિયા આપ્‍યા હતા. સામે પતિએ પણ તમામ સ્‍થાવર અને જંગમ મિલકતો પર તેનો અધિકાર છોડી દીધો છે. છૂટાછેડા બાદ પત્‍ની વડોદરામાં રહે છે જ્‍યારે પતિ કર્ણાટકમાં સેટલ થઈ ગયો છે.