દક્ષિણના સુપરસ્ટાર થલાપથી વિજયે રાજકારણમાં પ્રવેશ કર્યો છે અને રવિવારે તેમની પાર્ટી તમિલગા વેત્રી કઝગમ (TVK) ના પ્રથમ સંમેલનને સંબોધિત કર્યું છે. આ દરમિયાન વિજય સંપૂર્ણ રાજકીય અંદાજમાં જોવા મળ્યો હતો અને લોકોને રાજનીતિનો અર્થ પણ જણાવ્યો હતો.

રવિવારે પાર્ટીના પ્રથમ રાજ્ય સંમેલનમાં બોલતા વિજયે કહ્યું હતું કે, રાજનીતિ સિનેમાનું ક્ષેત્ર નથી પરંતુ યુદ્ધનું ક્ષેત્ર છે. તેમણે કહ્યું કે તેમના પક્ષના સભ્યોએ પાયાના સ્તરે સતર્ક રહેવું જોઈએ. સંમેલનને સંબોધતા તેમણે કહ્યું, 'રાજનીતિ સિનેમાનું ક્ષેત્ર નથી, તે યુદ્ધનું ક્ષેત્ર છે. આ ગંભીર છે. સાપ સાથેનો વ્યવહાર હોય કે રાજકારણ, જો આપણે તેને ગંભીરતા અને રમૂજ સાથે લેવાનું નક્કી કરીએ, તો જ આપણે આ ક્ષેત્રમાં ટકી શકીશું અને વિરોધીઓનો સામનો કરી શકીશું. આપણે જમીની સ્તરે સતર્ક રહેવાની જરૂર છે.

   તમિલગા વેત્રી કઝગમની વિચારધારા પર ચર્ચા કરતા, અભિનેતામાંથી રાજકારણી બનેલા વિજયે ભારપૂર્વક જણાવ્યું કે તેમનો ઉદ્દેશ્ય દ્રવિડિયન રાષ્ટ્રવાદ અને તમિલ રાષ્ટ્રવાદને અલગ કરવાનો ન હતો. તેમણે કહ્યું, આ દેશની બે આંખો છે. આપણે આપણી જાતને કોઈ એક ઓળખ સુધી મર્યાદિત ન કરવી જોઈએ. તેમણે ધર્મનિરપેક્ષ સામાજિક ન્યાયની વિચારધારાઓ પર તેમની પાર્ટીના પાયાને રેખાંકિત કર્યો અને કહ્યું કે TVK તે મુજબ કામ કરશે.

    વિજયે ડીએમકેની ટીકા કરતા આરોપ લગાવ્યો કે એક પરિવાર ભૂગર્ભ વ્યવહાર દ્વારા રાજ્યને લૂંટી રહ્યો છે. તેમણે કહ્યું, મેં રાજકારણમાં આવવા માટે મારી એક્ટિંગ કરિયર છોડી દીધી છે. હું અહીં તમારો વિજય બનીને આવ્યો છું અને તમારા બધા પર વિશ્વાસ કરું છું. એક જૂથ છે, જે એક જ સૂર ગાઈ રહ્યું છે, રાજકારણમાં પ્રવેશનાર દરેક વ્યક્તિને પ્રજા સાથે છેતરપિંડીનું લેબલ લગાવી રહ્યું છે. તેઓ ભૂગર્ભ સોદામાં સામેલ છે.

તેમણે આરોપ લગાવ્યો કે દ્રવિડિયન મોડલની આડમાં તેઓ જનવિરોધી સરકાર તરીકે લોકોને ગેરમાર્ગે દોરી રહ્યા છે. રેલી પહેલા, તમિલનાડુના નાયબ મુખ્ય પ્રધાન ઉધયનિધિ સ્ટાલિને વિજયને તેમના પ્રિય મિત્ર ગણાવીને શુભેચ્છા પાઠવી હતી. ઉધયનિધિ સ્ટાલિને પત્રકારોને કહ્યું, હું મારા પ્રિય મિત્ર વિજયને તેના ભવિષ્ય માટે શુભેચ્છા પાઠવું છું.

નોંધનીય છે કે થલાપતિ વિજયે રાજકારણમાં પ્રવેશ કર્યો હતો અને આ વર્ષે ફેબ્રુઆરીમાં તેમની પાર્ટી તમિલગા વેત્રી કઝગમની શરૂઆત કરી હતી. તમિલનાડુ વિધાનસભાની ચૂંટણી 2026માં યોજાવાની ધારણા છે. હાલમાં ડીએમકે પાર્ટી રાજ્યમાં સત્તા પર છે અને એમકે સ્ટાલિન મુખ્યમંત્રી છે.