નવી દિલ્હી :દિલ્હીના પૂર્વ મુખ્યમંત્રી અરવિંદ કેજરીવાલે બુધવારે એક પ્રેસ કોન્ફરન્સમાં દિલ્હીના 64,000 સ્વચ્છતા કર્મચારીઓ માટે મોટી જાહેરાત કરી હતી, ત્યારે તેમણે દિલ્હી-એનસીઆરમાં ફટાકડા પર પ્રતિબંધ પર ઉઠાવવામાં આવેલા પ્રશ્નોના જવાબ પણ આપ્યા હતા.

   જ્યારે દિલ્હીના પૂર્વ મુખ્યમંત્રીને પ્રેસ કોન્ફરન્સ દરમિયાન ફટાકડા પર પ્રતિબંધ અંગે પૂછવામાં આવ્યું ત્યારે તેમણે કહ્યું કે સુપ્રીમ કોર્ટ, હાઈકોર્ટ બધાએ કહ્યું છે કે દિવાળી એ રોશનીનો તહેવાર છે, ખુશીનો તહેવાર છે ફટાકડા ફોડવાનો નહીં.

   પ્રદૂષણને ધ્યાનમાં રાખીને, આપણે દીવાઓ અને મીણબત્તીઓ પ્રગટાવીને આપણા તહેવારોની ઉજવણી કરવી જોઈએ. ફટાકડા ન બાળવા જોઈએ, તેનાથી પ્રદૂષણ થાય છે. કેજરીવાલે વધુમાં કહ્યું કે ફટાકડા ન ફોડવાથી એવું નથી કે અમે કોઈનો ઉપકાર કરી રહ્યા છીએ. આપણે આપણી જાત પર ઉપકાર કરી રહ્યા છીએ.

    જો પ્રદૂષણ હશે તો આપણે તેનો ભોગ બનશું, આપણા નાના બાળકો ભોગવશે. આમાં હિંદુ-મુસ્લિમ કે કોઈ ધર્મનો પ્રશ્ન નથી, દરેકનો શ્વાસ મહત્વનો છે. 

    અત્રે  ઉલ્લેખનીય છે કે બાગેશ્વર ધામ સરકારના પંડિત ધીરેન્દ્ર શાસ્ત્રીએ દિવાળી પર ફટાકડા પર પ્રતિબંધને લઈને મોટું નિવેદન આપ્યું છે. તેમણે ફટાકડા પર પ્રતિબંધને દુર્ભાગ્યપૂર્ણ ગણાવ્યો અને તેને હિન્દુ તહેવારો પર હુમલો અને ષડયંત્ર ગણાવ્યું.

   તેમનું કહેવું છે કે બકરીદ પર કેમ કોઈ સવાલ ઉઠાવતું નથી. જ્યારે પણ સનાતન ધર્મના તહેવારો આવે છે ત્યારે કાયદાના ભંગની વાતો થાય છે. તેમણે કહ્યું કે ઘણા લોકો એવું પણ કહે છે કે આટલા બધા તેલના દીવા બાળવાથી કેટલા ગરીબોને ફાયદો થશે.