નવી દિલ્હી : દેશની રાજધાની દિલ્હીના શાહદરા વિસ્તારમાં દિવાળીની રાત્રે કાકા અને ભત્રીજાની ગોળી મારીને હત્યા કરવામાં આવી હતી  હવે આ મામલે મોટો ખુલાસો થયો છે. આ ડબલ મર્ડરનો માસ્ટર માઈન્ડ સગીર સંબંધી હોવાનું બહાર આવ્યું છે. આ સમગ્ર ઘટના પૈસાની લેવડદેવડને લઈને બની હતી. પોલીસે સગીરને પકડી લીધો છે. પોલીસ પૂછપરછ દરમિયાન સગીર આરોપીએ જણાવ્યું કે મૃતક આકાશ શર્માએ તેને 70 હજાર રૂપિયા આપવાનો વાયદો કર્યો હતો, પરંતુ બાદમાં તેણે પૈસા આપવાની ના પાડી દીધી હતી. તેને પૈસા ન આપવા બદલ તે તેમની પાસેથી બદલો લેવા માંગતો હતો. તેણે તેના મિત્રોને આકાશની હત્યા કરવાની વાત કરી અને ઘટનાને અંજામ આપ્યો હતો

   નોંધનીય છે કે સગીર 17 દિવસથી આ હત્યાની યોજના ઘડી રહ્યો હતો અને ભૂતકાળમાં પણ અનેક ઘટનાઓમાં સંડોવાયેલો હતો. વાસ્તવમાં આરોપીના નિશાને માત્ર આકાશ જ હતો, પરંતુ પહેલા ક્રિશને ભૂલથી ગોળી વાગી અને ત્યાર બાદ જ્યારે રિષભે આરોપીને પકડવાનો પ્રયાસ કર્યો તો તેણે રિષભને પણ ગોળી મારી દીધી. 

   આ મામલે મૃતક આકાશના ભાઈ અને મૃતક ઋષભના પિતા યોગેશે જણાવ્યું કે આ ઘટના ગઈકાલે સાંજે 7.30-8.00 વાગ્યાની વચ્ચે બની હતી. બે લોકો આવ્યા હતા, મારા ભાઈ અને પુત્રની ટુ-વ્હીલર પર સવાર વ્યક્તિ દ્વારા હત્યા કરવામાં આવી હતી. થોડા સમય પહેલા મારા ભાઈને કોઈની સાથે પૈસા બાબતે ઝઘડો થયો હતો.

   યોગેશે જણાવ્યું કે જ્યારે આ ઘટના બની ત્યારે તે પણ ઘરે હાજર હતો. હુમલાખોર તેનો સંબંધી છે. હત્યાનો ગુનેગાર તેનો ભત્રીજો હોવાનું જણાય છે. આરોપી મારા કાકાના દીકરાનો દીકરો છે. તે સ્કૂટર પર આવ્યો હતો. બાદમાં તેના પગને સ્પર્શ કર્યો અને હુમલો કર્યો. હુમલામાં મારો ભાઈ અને પુત્ર માર્યા ગયા છે જ્યારે ક્રિશ ઘાયલ છે.

    દિલ્હીના શાહદરા વિસ્તારમાં બે લોકોની હત્યાને લઈને આમ આદમી પાર્ટીએ દિલ્હીમાં કાયદો અને વ્યવસ્થા પર સવાલો ઉઠાવ્યા છે. AAP ધારાસભ્ય સૌરભ ભારદ્વાજે કહ્યું કે ગઈ કાલે જ્યારે આખો દેશ દિવાળીની ઉજવણી કરી રહ્યો હતો, ત્યારે દિલ્હીના શાહદરામાં તેમના ઘરની બહાર દિવાળીની ઉજવણી કરી રહેલા પરિવાર પર ફાયરિંગ કરીને બે લોકોના મોત થયા હતા અને એક બાળકની હાલત નાજુક છે. છેલ્લા કેટલાક મહિનામાં દિલ્હીમાં કાયદો અને વ્યવસ્થાની સ્થિતિ એટલી કથળી ગઈ છે કે 60 રાઉન્ડ ફાયરિંગ કરવામાં આવે છે, બોમ્બ બ્લાસ્ટ કરવામાં આવે છે, ખંડણી માંગવા માટે ખુલ્લેઆમ ફાયરિંગ કરવામાં આવે છે.

   તેણે કહ્યું હતું કે મુંબઈમાં ખંડણીની માગણી, હત્યાઓ, અલગ-અલગ ગેંગ સક્રિય હોવાના સંજોગો સાંભળવા મળ્યા હતા. તે સ્થિતિ આજે દેશની રાજધાની દિલ્હીમાં બની છે. કાયદો અને વ્યવસ્થાની સ્થિતિ કેમ આવી બની છે તેનો જવાબ ભાજપની કેન્દ્ર સરકારે આપવો જોઈએ. ગુજરાતની જેલમાં બેઠેલા ગુંડાઓ દેશની રાજધાનીમાં મોબાઈલ ફોન ન પહોંચી શકે તેવી જગ્યાએથી પોતાની ગેંગ કેવી રીતે ચલાવી રહ્યા છે? આનો જવાબ કેન્દ્રની ભાજપ સરકારે આપવો પડશે.