<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 12th November 2024

ઉદ્ધવ ઠાકરે ભાજપની સાથે છેઃ દિગ્‍ગજ નેતાના દાવાથી ભારે ચર્ચા

મુંબઈ : મહારાષ્‍ટ્ર વિધાનસભા ચૂંટણીના મતદાનને બસ હવે ગણતરીના જ દિવસો બાકી છે. ત્‍યારે ચૂંટણીમાં મુખ્‍ય મુકાબલો મહાયુતિ અને મહાવિકાસ આઘાડી વચ્‍ચે છે, પરંતુ એક નિવેદનથી મહારાષ્‍ટ્રના રાજકારણમાં ખળભળાટ મચી ગયો છે અને સવાલ ઉઠી રહ્યો છે કે શું ઉદ્ધવ ઠાકરે ફરી એકવાર ભારતીય જનતા પાર્ટી સાથે ગઠબંધન કરશે. વંચિત બહુજન અઘાડી ના પ્રમુખ પ્રકાશ આંબેડકરે દાવો કર્યો છે કે ઉદ્ધવ ઠાકરેની શિવસેના (શિવસેના યુબીટી) સ્‍પષ્ટપણે ભાજપ સાથે જોડાયેલી હોય તેવું લાગે છે.

મહારાષ્‍ટ્રના વાશિમમાં પત્રકારો સાથે વાત કરતા વંચિત બહુજન અઘાડી ના પ્રમુખ પ્રકાશ આંબેડકરે કહ્યું, ઁઉદ્ધવ ઠાકરેની શિવસેના (શિવસેના યુબીટી) સ્‍પષ્ટપણે ભાજપ સાથે જોડાયેલી હોય તેવું લાગે છે. તેણે તે શરતો જાહેર કરવી જોઈએ કે જેના પર તે પોતાનું સમર્થન આપી રહ્યો છે. જ્‍યારે વકફ સુધારો બિલ સંસદમાં રજૂ કરવામાં આવ્‍યું ત્‍યારે ઉદ્ધવ ઠાકરેના સાથી પક્ષો તેનો વિરોધ કરવા સંસદમાં હાજર ન હતા.

શિવસેના પ્રમુખ ઉદ્ધવ ઠાકરેએ સોમવારે દાવો કર્યો હતો કે ૨૦ નવેમ્‍બરે યોજાનારી મહારાષ્‍ટ્ર વિધાનસભાની ચૂંટણીના પ્રચાર માટે જ્‍યારે તેઓ યવતમાલ પહોંચ્‍યા ત્‍યારે સરકારી અધિકારીઓએ તેમની બેગ તપાસી હતી. પૂર્વ મુખ્‍યમંત્રીએ પૂછયું કે શું ચૂંટણી અધિકારીઓ વડાપ્રધાન નરેન્‍દ્રભાઈ મોદી અને અન્‍ય વરિષ્ઠ નેતાઓના સામાનની પણ તપાસ કરશે? ઠાકરેએ યવતમાલના વાનીમાં શિવસેના ઉમેદવાર સંજય ડેરકરના સમર્થનમાં આયોજિત જાહેર સભાને સંબોધિત કરતી વખતે આ કથિત ઘટના વિશે માહિતી આપી હતી. મહારાષ્‍ટ્ર વિધાનસભા ચૂંટણી માટે ૨૦ નવેમ્‍બરે એક જ તબક્કામાં તમામ ૨૮૮ બેઠકો પર મતદાન થશે. આ પછી ૨૩ નવેમ્‍બરે મતગણતરી થશે. આ વખતે ચૂંટણીમાં મહાયુતિ અને મહાવિકાસ આઘાડી વચ્‍ચે મુકાબલો છે. ભારતીય જનતા પાર્ટી ઉપરાંત, એકનાથ શિંદેની શિવસેના અને અજિત પવારની NCP મહાગઠબંધનમાં સામેલ છે. જ્‍યારે ઉદ્ધવ ઠાકરેની શિવસેના ઉપરાંત શરદ પવારની એનસીપી અને કોંગ્રેસ મહાવિકાસ અઘાડીમાં સામેલ છે.

(4:55 PM IST)