નવી દિલ્હી. મહારાષ્ટ્રના પૂર્વ મુખ્યમંત્રી અને શિવસેના (UBT)ના પ્રમુખ ઉદ્ધવ ઠાકરેની બેગની તપાસને લઈને રાજકીય હંગામો શરૂ થઈ ગયો છે. જ્યારે શિવસેના (UBT) એ બેગ ચેકિંગ પર સવાલ ઉઠાવ્યા હતા, ત્યારે હવે ચૂંટણી પંચે કહ્યું કે સ્ટાન્ડર્ડ ઓપરેટિંગ પ્રોસિજર (SOP) હેઠળ તમામ રાજકીય પક્ષોના ટોચના નેતાઓના પ્લેન અને હેલિકોપ્ટરની તપાસ કરવામાં આવે છે.

   ચૂંટણી પંચે કહ્યું કે છેલ્લી ચૂંટણીમાં ભાજપ અધ્યક્ષ જેપી નડ્ડા અને કેન્દ્રીય ગૃહમંત્રી અમિતભાઈ  શાહના વિમાનો અને હેલિકોપ્ટરની તપાસ કરવામાં આવી છે. એક અધિકારીએ કહ્યું કે અમલીકરણ એજન્સીઓ કડક SOPનું પાલન કરે છે.

     2024 ની લોકસભા ચૂંટણી દરમિયાન બિહારમાં સમાન મુદ્દો ઉઠાવવામાં આવ્યો હતો અને તે સ્પષ્ટ કરવામાં આવ્યું હતું કે 24 એપ્રિલે ભાગલપુર જિલ્લામાં નડ્ડા સહિતના અગ્રણી નેતાઓના હેલિકોપ્ટરની તપાસ કરવામાં આવી હતી. 21 એપ્રિલે અમિતભાઈ શાહની પણ બિહારના કટિહાર જિલ્લામાં એસઓપી મુજબ તપાસ કરવામાં આવી હતી.

   ન્યૂઝ એજન્સી પીટીઆઈએ ચૂંટણી પંચના સૂત્રોના આધારે આ માહિતી આપી છે. સૂત્રોએ મુખ્ય ચૂંટણી કમિશનર રાજીવ કુમારના નિવેદનનો પણ ઉલ્લેખ કર્યો, જેમાં વિધાનસભા ચૂંટણીની જાહેરાત દરમિયાન, તેમણે તમામ નેતાઓના હેલિકોપ્ટરની તપાસ સુનિશ્ચિત કરવા માટે અમલીકરણ એજન્સીઓને નિર્દેશ આપ્યો હતો, જેથી દરેકને સમાન તક મળી શકે. 

શિવસેના (UBT)ના વડા ઉદ્ધવ ઠાકરેએ સોમવારે દાવો કર્યો હતો કે ચૂંટણી અધિકારીઓએ જ્યારે તેઓ ચૂંટણી પ્રચાર માટે મહારાષ્ટ્રના યવતમાલ પહોંચ્યા ત્યારે તેમની બેગ તપાસી હતી. તેમણે એમ પણ પૂછ્યું કે શું ચૂંટણી અધિકારીઓ વડાપ્રધાન નરેન્દ્ર મોદી અને અન્ય વરિષ્ઠ નેતાઓની બેગની પણ તપાસ કરશે?

 શિવસેના (UBT)એ X પર એક વીડિયો પણ પોસ્ટ કર્યો છે. આ વીડિયો બેગ ચેક કરવાના સમયનો છે. વીડિયોમાં ઉદ્ધવ ઠાકરે અધિકારીઓને પૂછે છે કે શું તેઓએ અન્ય વરિષ્ઠ નેતાઓ પર પણ આવી જ તપાસ કરી છે. શું તેઓ પીએમ મોદી અને કેન્દ્રીય ગૃહ પ્રધાન અમિત શાહની બેગ તપાસશે?