ક્રેડિટ કાર્ડના બિલમાં ડિફોલ્ટરો વધ્યા : નવા કાર્ડ ઈશ્યૂ કરવામાં બ્રેક
ક્રેડિટ કાર્ડ એક પ્રકારની અનસિકયોર્ડ લોન છે અને તેને ભરવામાં ઘણા લોકો ડિફોલ્ટ થઈ રહ્યા છે : નવા કાર્ડ ઈશ્યૂ કરવાનું પ્રમાણ ૬૪ ટકા કરતા પણ વધારે ઘટી ગયું : અત્યારે દેશમાં કુલ ૧૦.૬ કરોડ ક્રેડિટ કાર્ડ છે. યુવા પેઢીમાં ડિફોલ્ટનું પ્રમાણ વધારે : ઓગસ્ટ મહિનામાં ૯.૨૦ લાખ ક્રેડિટ કાર્ડ ઈશ્યૂ થયા હતાઃ જ્યારે સપ્ટેમ્બર મહિનામાં ૬.૨૦ લાખ ક્રેડિટ કાર્ડ ઈશ્યૂ કરાયા હતાઃ એટલે કે એક મહિનામાં સીધો ત્રણ લાખનો ઘટાડો થયો હતો
મુંબઇ તા. ૧૩ : ક્રેડિટ કાર્ડનો ઉપયોગ કરીને શોપિંગ કરવાની તો બહુ મજા આવે છે, પણ જ્યારે બિલ ભરવાના આવે ત્યારે ઘણા લોકો તેમાં કાચા પડે છે. ક્રેડિટ કાર્ડના બિલ ભરવામાં ડિફોલ્ટરોની સંખ્યા વધી ગઈ છે અને તેના કારણે બેન્કોએ નવા કાર્ડ ઈશ્યૂ કરવાનું ઘટાડી દીધું છે. તહેવારોની સિઝનમાં ભારતમાં સૌથી વધારે ક્રેડિટ કાર્ડ ઈશ્યૂ કરવામાં આવતા હોય છે, પરંતુ આ વખતે બેન્કોએ તેમાં બ્રેક લગાવી હતી, કારણ કે ઘણા લોકો ક્રેડિટ કાર્ડનું દેવું ભરી શકતા નથી અને ડિફોલ્ટ થાય છે.
રિઝર્વ બેન્કનો ડેટા કહે છે કે ઓગસ્ટ મહિનામાં ૯.૨૦ લાખ ક્રેડિટ કાર્ડ ઈશ્યૂ થયા હતા જ્યારે સપ્ટેમ્બર મહિનામાં ૬.૨૦ લાખ ક્રેડિટ કાર્ડ ઈશ્યૂ કરાયા હતા. એટલે કે એક મહિનામાં સીધો ત્રણ લાખનો ઘટાડો થયો હતો. એક વર્ષ અગાઉના ડેટાની સાથે સરખામણી કરવામા આવે તો નવા કાર્ડ ઈશ્યૂ કરવાનું પ્રમાણ ૬૪ ટકા કરતા પણ વધારે ઘટી ગયું છે. અત્યારે દેશમાં કુલ ૧૦.૬ કરોડ ક્રેડિટ કાર્ડ છે. ક્રેડિટ કાર્ડ એ એક પ્રકારની અનસિકયોર્ડ લોન છે તેથી એક્સપર્ટ્સ માને છે કે નવા કાર્ડ ઈશ્યૂ કરવાનું પ્રમાણ હજુ પણ ઘટશે.
ડેટા દર્શાવે છે કે મોટા ભાગના નવા કાર્ડ એચડીએફસી બેન્ક અને એસબીઆઈ કાર્ડ્સ દ્વારા ઈશ્યૂ કરવામાં આવ્યા હતા. પણ ડિફોલ્ટરો એટલા વધી ગયા છે કે નજીકના ગાળામાં તો કાર્ડ આપવાનું પ્રમાણ ઘટી જવાનું છે. આ ઉપરાંત આરબીઆઈએ પણ બેન્કોને ચોખ્ખી સૂચના આપી છે કે રિસ્કને બરાબર જોયા - પારખ્યા પછી જ કાર્ડ ઈશ્યૂ કરવામાં આવે.
ભારતમાં તહેવારોની સિઝનમાં ક્રેડિટ કાર્ડની માંગ અને તેનો યુઝ વધી જતા હોય છે અને લોકો આ મહિનામાં લગભગ પાંચ ટકા જેટલો વધારે ખર્ચ કરે છે. મિડલ ઈન્કમ કેટેગરીમાં આવતા ઘણા લોકો કાર્ડથી પેમેન્ટ કરે છે પણ પછી બિલ ભરવામાં મુશ્કેલીમાં મૂકાઈ જાય છે જેના કારણે બેન્કોએ સાવધાન થઈ જવું પડ્યું છે.
સપ્ટેમ્બર મહિનામાં ભારતમાં એચડીએફસી બેન્કે ૪.૩૦ લાખ કાર્ડ ઈશ્યૂ કર્યા હતા, ત્યાર પછી એસબીઆઈએ ૧.૪૦ લાખ, એક્સિસ બેન્કે ૫૩ હજાર અને ત્ઘ્ત્ઘ્ત્ બેન્કે ૪૦૦૦ કાર્ડનો ઉમેરો કર્યો હતો. ચિંતાની વાત એ છે કે ક્રેડિટ કાર્ડ પોર્ટફોલિયોમાં ડિફોલ્ટનું પ્રમાણ લગભગ ૬ ટકા સુધી પહોંચી ગયું છે. છેલ્લા કેટલાય વર્ષોથી આટલા મોટા પાયે ડિફોલ્ટ જોવા નથી મળ્યું.
મિડલ ક્લાસમાં ખાસ કરીને શહેરી મિડલ ક્લાસમાં સ્લોડાઉન જોવા મળ્યું છે. ઓગસ્ટ મહિનામાં ક્રેડિટ કાર્ડ ટ્રાન્ઝેક્શન વોલ્યુમમાં ૧.૬ ટકા વધારો થયો હતો જ્યારે સપ્ટેમ્બરમાં આ ગ્રોથ માત્ર ૦.૫ ટકા હતો. તહેવારની સિઝનના કારણે ક્રેડિટ કાર્ડ પર થયેલો કુલ ખર્ચ ૧.૬૯ લાખ કરોડથી વધીને ૧.૭૭ લાખ કરોડ થયો હતો.
બેન્કોનું કહેવું છે કે નવી પેઢીના જે યંગ કાર્ડ ધારકો છે, તેઓ આખે આખી લિમિટ વાપરી નાખે છે અને પછી તે રકમની ભરપાઈ પણ કરી શકતા નથી. તેથી તેઓ કાર્ડના બિલ ભરવામાં ડિફોલ્ટ થાય છે અને તેમના એકાઉન્ટ એનપીએ બની જાય છે. બેન્કિંગ રેગ્યુલેટરે ચેતવણી આપી છે કે અનસિકયોર્ડ સેગમેન્ટમાં રિસ્ક વધારે છે. તેમણે કન્ઝમ્પશનના પર્પઝથી પર્સનલ લોન આપવામાં સાવચેતી રાખવા કહ્યું છે અને બહુ એગ્રેસિવ રીતે ક્રેડિટ કાર્ડ ન આપવા કહ્યું છે કારણ કે આગળ જતા તે રકમ વસુલ કરવી મુશ્કેલ પડી શકે છે.
(4:03 PM IST)
છેલ્લા 8 દિવસમાં સૌથી લોકપ્રિય 
