નવી દિલ્હી : મણિપુરમાં હિંસા અટકવાનું નામ નથી લઈ રહી. કેન્દ્રીય ગૃહ પ્રધાન અમિતભાઈ  શાહે રાજ્યમાં કથળતી કાયદો અને વ્યવસ્થાની સ્થિતિને લઈને સતત બીજા દિવસે અધિકારીઓ સાથે ઉચ્ચ સ્તરીય બેઠક યોજી હતી. તેમણે સુરક્ષા વ્યવસ્થાની સમીક્ષા કરી અને સુરક્ષા દળો અને રાજ્ય એજન્સીઓને શાંતિ જાળવવા સૂચના આપી.અમિતભાઇ  શાહે રાજ્યમાં સુરક્ષા માટે કેન્દ્રીય પોલીસ દળોની 50 વધારાની કંપનીઓ મોકલી છે.

   કેન્દ્રમાં સુરક્ષા તંત્ર સાથે સંકળાયેલા સૂત્રોએ જણાવ્યું હતું કે ગૃહ પ્રધાને રવિવાર પછી સોમવારે અહીં લાંબી બેઠકમાં વરિષ્ઠ સુરક્ષા અધિકારીઓ સાથે પરિસ્થિતિની વિગતવાર સમીક્ષા કરી હતી. તેમણે કેન્દ્રીય પોલીસ દળો અને રાજ્ય પોલીસને રાજ્યમાં કાયદો અને વ્યવસ્થા જાળવવા અને શાંતિ પુનઃસ્થાપિત કરવા પગલાં લેવા જણાવ્યું હતું. 

    દરમિયાન, કેન્દ્ર સરકાર મણિપુરમાં કાયદો અને વ્યવસ્થા જાળવવા માટે કેન્દ્રીય પોલીસ દળોની તૈનાતી પણ વધારી રહી છે અને કેન્દ્રીય પોલીસ દળોની 50 વધારાની કંપનીઓ ત્યાં મોકલવામાં આવી રહી છે. આ પહેલા પણ કેન્દ્રએ ત્યાં 20 કંપનીઓ તૈનાત કરી હતી. 

  મણિપુરમાં હિંસાની તાજેતરની ઘટનાઓને કારણે વધતા તણાવને ધ્યાનમાં રાખીને, શ્રી શાહે રવિવારે મહારાષ્ટ્રમાં ચૂંટણી પ્રચાર કાર્યક્રમ અધૂરો છોડી દીધો હતો અને નોર્થ બ્લોકમાં વરિષ્ઠ સુરક્ષા અધિકારીઓ સાથેની કટોકટીની બેઠકમાં મણિપુરની સ્થિતિની સમીક્ષા કરી હતી. 

  નોંધનીય છે કે મણિપુરમાં હિંસાની તાજેતરની ઘટનાઓ બાદ ઘણા જિલ્લાઓમાં કર્ફ્યુ લાદવામાં આવ્યો છે અને કેટલાક અન્ય વિસ્તારોમાં ઇન્ટરનેટ સેવાઓ પણ બંધ છે. હિંસાની ઘટનાઓ બાદ ગુસ્સે ભરાયેલા ટોળાએ કેટલાક ધારાસભ્યો અને મંત્રીઓના ઘરોમાં તોડફોડ અને આગચંપી કરી હતી, જેના કારણે રાજ્યના કેટલાક ભાગોમાં તણાવની સ્થિતિ છે.