નવી દિલ્‍હીઃ અદાણી ગ્રુપના ચેરમેન ગૌતમ અદાણી માટે ગુરુવારનો દિવસ ખૂબ જ ખરાબ રહયો. યુએસ કોર્ટે લાંચ અને છેતરપિંડીના આરોપમાં ધરપકડ વોરંટ જારી કર્યા બાદ અદાણી ગ્રૂપની કંપનીઓના શેર તૂટયા હતા. ઘણા શેર તો નીચલી સર્કિટ સુધી પહોંચ્‍યા હતા. આ ઘટાડાને કારણે અદાણીને મોટું નુકસાન થયું છે. હિંડનબર્ગ રિસર્ચના રિપોર્ટ બાદ અદાણીના શેરમાં આ સૌથી મોટો ઘટાડો છે.

ગુરુવારે સવારે અદાણી ગ્રુપના ત્રણ શેર ૨૦% તૂટયા હતા. ઈકોનોમિક ટાઈમ્‍સ અનુસાર, અદાણી ગ્રુપના તમામ ૧૧ શેરનું               કુલ માર્કેટ કેપ લગભગ રૂ. ૨ લાખ કરોડ ઘટીને રૂ. ૧૨.૩ લાખ કરોડ થયું છે. ૨૦૨૩ ની શરૂઆતમાં હિંડનબર્ગ રિસર્ચના અહેવાલ પછી આ જૂથનો સૌથી ખરાબ ટ્રેડિંગ દિવસ હતો.

આ ઘટાડાને કારણે અદાણીની નેટવર્થમાં પણ ઘટાડો થયો છે. ફોર્બ્‍સની રિયલ ટાઈમ બિલિયોનેર્સ લિસ્‍ટ અનુસાર, અદાણીની કુલ સંપત્તિ પણ $૧૦.૫ બિલિયન ઘટીને $૫૯.૩ બિલિયન થઈ ગઈ છે.

અદાણી અને તેમના ભત્રીજા સહિત કુલ ૮ લોકો પર યુએસ પ્રોસિકયુટર્સ દ્વારા લાંચ લેવાનો આરોપ મૂકવામાં આવ્‍યો છે. ફરિયાદીઓના જણાવ્‍યા અનુસાર, સૌર ઉર્જા કરાર મેળવવા માટે કથિત રીતે ભારત સરકારના અધિકારીઓને $૨૬૫ મિલિયનની લાંચ આપવામાં આવી હતી. આ કેસમાં કોર્ટે અદાણી અને તેમના ભત્રીજા સામે ધરપકડ વોરંટ જારી કર્યું છે.

આ આરોપો બાદ અદાણી ગ્રૂપના તમામ શેરમાં ભારે ઘટાડો થયો હતો. ગ્રૂપની મુખ્‍ય કંપની અદાણી એન્‍ટરપ્રાઈઝનો શેર ૨૦% ઘટીને રૂ. ૨,૨૫૬.૨૦ થયો હતો. અદાણી એનર્જી સોલ્‍યુશન્‍સનો શેર પણ ૨૦% ની નીચલી સર્કિટને અથડાયો. અદાણી પોર્ટ્‍સમાં પણ ૨૦%નો ઘટાડો થયો છે.

મૂડીઝ રેટિંગ્‍સે ગુરુવારે જણાવ્‍યું હતું કે આ સમાચાર અદાણી ગ્રુપની કંપનીઓ માટે ક્રેડિટ નેગેટિવ છે. મૂડીઝે જણાવ્‍યું હતું કે અદાણી ગ્રૂપના ચેરમેન અને અન્‍ય એક્‍ઝિકયુટિવ્‍સ પર લાંચ લેવાના આરોપમાં આરોપ મૂકવો એ જૂથની કંપનીઓ માટે ક્રેડિટ નેગેટિવ છે.

ઓસ્‍ટ્રેલિયામાં અદાણી બુલ જીકયુજીના શેર ૨૬% ઘટયા હતા. GQGએ એક નિવેદનમાં જણાવ્‍યું હતું કે, અમે અદાણી અને જૂથના કેટલાક અધિકારીઓ અને કંપનીઓ પર લાગેલા આરોપો પર નજર રાખી રહ્‍યા છીએ. ‘અમારી ટીમ ઉભરતી વિગતોની સમીક્ષા કરી રહી છે અને અમારા પોર્ટફોલિયો માટે કઈ ક્રિયા યોગ્‍ય છે તે નક્કી કરી રહી છે.'