News of Wednesday, 11th December 2024
તમે લેડી કિલર છો...સિંધિયા પર ટીએમસી સાંસદ કલ્યાણ બેનર્જીનું વિવાદી નિવેદન: ગૃહમાં હંગામો.
TMC સાંસદ કલ્યાણ બેનર્જી અને કેન્દ્રીય મંત્રી જ્યોતિરાદિત્ય સિંધિયા વચ્ચે ઉગ્ર ચર્ચા :બેનર્જીએ સિંધિયાને લેડી કિલર કહ્યા, જેને સિંધિયાએ અંગત અને અપમાનજનક ગણાવ્યા.આ પછી બેનર્જીએ માફી માંગી

નવી દિલ્હી :સંસદના શિયાળુ સત્ર દરમિયાન લોકસભામાં જોરદાર ચર્ચા અને હંગામો થયો હતો. ટીએમસી સાંસદ કલ્યાણ બેનર્જી અને કેન્દ્રીય મંત્રી અને બીજેપી સાંસદ જ્યોતિરાદિત્ય સિંધિયા વચ્ચે ઉગ્ર બોલાચાલી થઈ હતી. મામલો ત્યારે ગરમાયો જ્યારે કલ્યાણ બેનર્જીએ સિંધિયા પર કટાક્ષ કર્યો અને તેમને હેન્ડસમ, વિલન અને લેડી કિલર કહ્યા. સિંધિયાએ આ ટિપ્પણી પર નારાજગી વ્યક્ત કરી અને તેને વ્યક્તિગત અને અપમાનજનક ગણાવી
પોતાની ટિપ્પણીમાં કલ્યાણ બેનર્જીએ સિંધિયાના પરિવાર પર પણ સવાલો ઉઠાવ્યા અને કહ્યું, 'તમે મહારાજા છો, પરંતુ તેનો અર્થ એ નથી કે તમે બીજાને નાનો સમજો.' આના પર સિંધિયાએ જવાબ આપ્યો, 'જો મારા પરિવારની બદનામી થશે તો હું ચૂપ નહીં રહીશ. કોઈ પણ આદરણીય વ્યક્તિ આવી વાત સહન કરશે નહીં. તેમના નિવેદન બાદ બંને નેતાઓ વચ્ચે જોરદાર ચર્ચા શરૂ થઈ હતી.
વધી રહેલા હંગામાને જોઈને કલ્યાણ બેનર્જીએ પોતાના નિવેદન માટે માફી માંગી હતી. તેણે કહ્યું કે તેનો ઈરાદો કોઈને દુઃખ પહોંચાડવાનો નહોતો. જો કે, સિંધિયાએ તેમની માફી નકારી કાઢી હતી અને કહ્યું હતું કે આ માત્ર તેમનું જ નહીં પરંતુ દેશની મહિલાઓનું પણ અપમાન છે. તેમણે કહ્યું, 'સદનમાં ચર્ચા નીતિઓ પર હોવી જોઈએ, વ્યક્તિગત ટિપ્પણીઓ પર નહીં. દરેક સાંસદ અહીં સ્વાભિમાન સાથે આવે છે.
ભાજપના સાંસદો, ખાસ કરીને મહિલા સાંસદોએ કલ્યાણ બેનર્જીની ટિપ્પણીનો ઉગ્ર વિરોધ કર્યો હતો. તેને મહિલાઓનું અપમાન ગણાવીને બેનર્જીને સસ્પેન્ડ કરવાની માંગ કરી હતી. ગૃહમાં શાસક પક્ષ અને વિપક્ષ વચ્ચે ચર્ચા અને હોબાળાનું વાતાવરણ હતું. ગૃહની કામગીરીમાં વારંવાર વિક્ષેપ પડતો હતો, જેના કારણે કાર્યવાહી સ્થગિત કરવી પડી હતી.
(11:43 PM IST)









છેલ્લા 8 દિવસમાં સૌથી લોકપ્રિય 
