અલીગઢઃ અલીગઢ મુસ્લિમ યુનિવર્સિટી (AMU)ના કેમેસ્ટ્રી વિભાગના પ્રોફેસરનો ચોંકાવનારો કિસ્સો સામે આવ્યો છે. પ્રોફેસર પર વિદ્યાર્થીનીઓના નામે ખોટી ફરિયાદો કરીને પોલીસ અને યુનિવર્સિટી પ્રશાસનને ગેરમાર્ગે દોરવાનો આરોપ છે. ક્યારેક હિંદુ સ્ટુડન્ટ તરીકે તો ક્યારેક મુસ્લિમ સ્ટુડન્ટ તરીકે દેખાડીને પ્રોફેસરે 22 વખત ખોટા ફરિયાદ પત્રો મોકલ્યા. આ મામલાના ખુલાસા બાદ AMU પ્રશાસને આંતરિક તપાસના આદેશ આપ્યા છે.

    રસાયણશાસ્ત્ર વિભાગના એસોસિયેટ પ્રોફેસર ડૉ. ઈશાત મોહમ્મદ ખાને આ સમગ્ર મામલાને જાહેર કર્યો. તેને શંકા હતી કે તેની સામે સતત ખોટી ફરિયાદો કરવામાં આવી રહી છે. તેણે જાતે જ કેસની તપાસ શરૂ કરી અને પુરાવા એકઠા કરીને પોલીસને સોંપ્યા 

   એવો આરોપ છે કે પ્રોફેસર રિયાઝુદ્દીને વિવિધ વિદ્યાર્થીનીઓના નામે રજિસ્ટ્રી અને સ્પીડ પોસ્ટ દ્વારા પોલીસને ફરિયાદ પત્રો મોકલ્યા હતા. આ પત્રોમાં તેમણે પોતાના જ વિભાગના પ્રોફેસર પર ધાર્મિક આરોપો, પરીક્ષાઓમાં ગેરરીતિ અને અન્ય ગેરરીતિઓનો આરોપ લગાવ્યો હતો. અધિકારીઓએ પણ આ ગંભીર આરોપોની તપાસ શરૂ કરી, જેના કારણે આ મામલો લાંબા સમય સુધી દબાયેલો રહ્યો. 

   ડૉ. ઈશાત મોહમ્મદ ખાને જણાવ્યું કે 16 નવેમ્બરે તેમણે AMU પ્રશાસનને ફરિયાદ કરી હતી. તેમણે સ્પષ્ટતા કરી કે પ્રોફેસર રિયાઝુદ્દીન સતત ખોટી ફરિયાદો મોકલી રહ્યા છે. આ પછી, પોસ્ટલ વિભાગના સીસીટીવી ફૂટેજ પોલીસ અને યુનિવર્સિટી પ્રશાસનને સોંપવામાં આવ્યા હતા. ફૂટેજમાં આરોપી પ્રોફેસર સ્પષ્ટપણે ફરિયાદ પત્ર મોકલતો જોવા મળ્યો હતો. 

  આ નક્કર પુરાવાના આધારે પોલીસે પ્રોફેસર રિયાઝુદ્દીનની પૂછપરછ કરી હતી. પહેલા તો તેણે તમામ આરોપોને નકારી કાઢ્યા અને કહ્યું કે તે પોતાની અંગત પોસ્ટ કરવા ગયો હતો. પરંતુ જ્યારે ફરિયાદ પત્ર, રસીદનો સમય અને સીસીટીવી રેકોર્ડિંગ મેચ થતા સમગ્ર સત્ય બહાર આવ્યું હતું. 

   અલીગઢ મુસ્લિમ યુનિવર્સિટીના જનસંપર્ક અધિકારી આસિમ સિદ્દીકીએ જણાવ્યું કે પુરાવાના આધારે આરોપી પ્રોફેસરની પૂછપરછ કરવામાં આવી. આખરે આરોપીએ પોતાની ભૂલ કબૂલી લીધી. પોલીસે સમગ્ર ઘટનાનું ઓડિયો-વિડિયો રેકોર્ડિંગ યુનિવર્સિટી પ્રશાસનને સોંપ્યું છે.

  AMUના રજિસ્ટ્રાર ઈમરાન ખાને (IPS) આરોપી પ્રોફેસરને નોટિસ પાઠવીને ખુલાસો માંગ્યો છે. પ્રોફેસરે 7 દિવસમાં નોટિસનો જવાબ આપવાનો રહેશે. જો તેનો જવાબ સંતોષકારક નહીં લાગે તો તેની સામે કડક ખાતાકીય કાર્યવાહી કરવામાં આવશે.