ક્રેડિટ કાર્ડનો કાળજીપૂર્વક ઉપયોગ કરજોઃ જો ડિફોલ્ટ થાય તો તમારે ૫૦% સુધીનું વ્યાજ ચૂકવવું પડશે
સુપ્રીમ કોર્ટે નેશનલ કન્ઝયુમર કોર્ટના નિર્ણયને ફગાવી દીધો છે : NCDRCએ કહ્યું હતું કે ક્રેડિટ કાર્ડ પર ગ્રાહકો પાસેથી ૩૬થી ૫૦ ટકા વાર્ષિક વ્યાજ વસૂલવું એ ખૂબ જ ઊંચી અને અયોગ્ય વ્યવસાય પ્રથા છે : સુપ્રીમ કોર્ટના આ નિર્ણયથી બેંકોને રાહત મળી છે
નવી દિલ્હી, તા.૨૧: ક્રેડિટ કાર્ડ એક એવું શષા છે જેને નિયંત્રણમાં રાખવામાં આવે તો સારું રહે છે. જો તે નિયંત્રણની બહાર જાય તો તે એક મોટી સમસ્યા બની જાય છે. જો ક્રેડિટ કાર્ડનું બિલ સમયસર ચૂકવવામાં ન આવે તો બેંકો ખૂબ જ વધારે વ્યાજ વસૂલે છે. મામલો નેશનલ કન્ઝ્યુમર કોર્ટ (NCDRC) સુધી પહોંચ્યો જયાં વ્યાજ દર ૩૦ ટકા સુધી મર્યાદિત હતો. પરંતુ હવે સુપ્રીમ કોર્ટે નેશનલ કન્ઝયુમર ફોરમના આ નિર્ણય પર સ્ટે મૂકી દીધો છે.
NCDRC એ તેના એક નિર્ણયમાં કહ્યું હતું કે ક્રેડિટ કાર્ડ પર ગ્રાહકો પાસેથી ૩૬ થી ૫૦ ટકા વાર્ષિક વ્યાજ વસૂલવું ઘણું વધારે છે. NCDRC એ તેને ખોટી બિઝનેસ પ્રેક્ટિસ ગણાવી હતી. પરંતુ સુપ્રીમ કોર્ટે NCDRCના આ નિર્ણય પર રોક લગાવી દીધી છે. તેનાથી બેંકોને રાહત મળી છે. બેંકો હવે ક્રેડિટ કાર્ડ પર ૩૦ ટકાથી વધુ અથવા ૫૦ ટકા સુધીનું વ્યાજ વસૂલી શકશે.
ગ્રાહક અદાલતે ક્રેડિટ કાર્ડ પરના વ્યાજ દરને મહત્તમ ૩૦% સુધી સીમિત કરી હતી. કન્ઝયુમર કમિશને કહ્યું હતું કે બેંકો અને ગ્રાહકો વચ્ચેની વાટાઘાટો અસમાન શરતો પર છે. ક્રેડિટ કાર્ડની સુવિધાને નકારવા સિવાય ગ્રાહકો પાસે ક્રેડિટ કાર્ડ સાથે કોઈ સોદાબાજી કરવાની શક્તિ નથી.
કમિશને એમ પણ કહ્યું હતું કે જો ઉપભોક્તાને તેની જવાબદારી નિભાવવામાં નિષ્ફળ રહેવા બદલ વધુ પડતો દંડ ચૂકવવો પડે તો તેને અયોગ્ય વેપાર વ્યવહાર ગણવામાં આવશે. આ માટે ગ્રાહક અદાલતે વિવિધ દેશોના ક્રેડિટ કાર્ડના વ્યાજ દરોની તુલના કરી હતી.
NCDRC એ પોતાના નિર્ણયમાં કહ્યું હતું કે અમેરિકા અને બ્રિટનમાં વ્યાજ દર ૯.૯૯% થી ૧૭.૯૯%ની વચ્ચે છે. ઓસ્ટ્રેલિયામાં વ્યાજ દર ૧૮% થી ૨૪% છે. ફિલિપાઇન્સ, ઇન્ડોનેશિયા અને મેક્સિકો (ઉભરતી અર્થવ્યવસ્થાઓ)માં વ્યાજ દર ૩૬% થી ૫૦% ટકા છે. ભારત જેવા વિશાળ અને વિકાસશીલ દેશમાં સર્વોચ્ચ દર અપનાવવાનું કોઈ ઔચિત્ય નથી.
ક્રેડિટ કાર્ડના વ્યાજ દરો પર ૩૦%ની ઉપલી મર્યાદા નક્કી કરતી વખતે, કમિશને કહ્યું હતું કે ૩૦%થી વધુ વ્યાજ દરો અતિશય ગણવામાં આવશે. આ અયોગ્ય વેપાર પ્રથા હેઠળ આવશે. આ પછી મામલો સુપ્રીમ કોર્ટમાં પહોંચ્યો હતો. ન્યાયમૂર્તિ બેલા એમ. ત્રિવેદી અને સતીશ ચંદ્ર શર્માની સર્વોચ્ચ અદાલતની બેન્ચે ૨૦૦૮ના આદેશને બાજુ પર રાખ્યો હતો અને બેંકો દ્વારા દાખલ કરાયેલી તમામ સિવિલ અપીલોને મંજૂરી આપી હતી.
(12:07 PM IST)
છેલ્લા 8 દિવસમાં સૌથી લોકપ્રિય 
