જેસલમેર, તા.૨૧:  ગુડ્‍સ એન્‍ડ સર્વિસ ટેક્‍સ (GST) કાઉન્‍સિલની ૫૫મી બેઠક રાજસ્‍થાનના જેસલમેરમાં ચાલી રહી છે. આ સમયગાળા દરમિયાન, આવા ઘણા નિર્ણયો લેવામાં આવ્‍યા છે જેની સીધી અસર તમારા ખિસ્‍સા પર પડી શકે છે. યુઝ્‍ડ કાર પર ટેક્‍સ ૧૨ ટકાથી વધારીને ૧૮ ટકા કરવામાં આવ્‍યો છે. આ EVs પર પણ લાગુ થશે. આ સાથે AAC બ્‍લોક, ફોર્ટિફાઇડ રાઇસ અને ફ્‌લેવર્ડ પોપકોર્ન પર પણ મોટા નિર્ણયો લેવામાં આવી રહ્‍યા છે.

સૂત્રો પાસેથી પ્રાપ્‍ત માહિતી અનુસાર, ૫૦% થી વધુ ફ્‌લાય એશ ધરાવતા ઓટોક્‍લેવ્‍ડ એરેટેડ કોંક્રિટ (AAC) બ્‍લોક્‍સ HS કોડ ૬૮૧૫ હેઠળ આવશે. આના પર ૧૮ ટકાના બદલે ૧૨ ટકા જીએસટી લાગશે. આ ફ્‌લાય એશના વપરાશને પ્રોત્‍સાહન આપશે.

નાણામંત્રી નિર્મલા સીતારમણની અધ્‍યક્ષતામાં મળેલી GST કાઉન્‍સિલની બેઠકમાં વપરાયેલી કારના વેચાણ પર ટેક્‍સ રેટ ૧૨ ટકાથી વધારીને ૧૮ ટકા કરવાની મંજૂરી આપવામાં આવી છે. આમાં વપરાયેલ ઇલેક્‍ટ્રિક વાહનોનો પણ સમાવેશ થાય છે. આનાથી તમારા માટે જૂની કાર ખરીદવી મોંઘી થઈ જશે.

કાઉન્‍સિલે હાલની છૂટછાટોને જટિલ બનાવવાને બદલે ફોર્ટિફાઇડ ચોખાના દાણા માટે GST માળખું સરળ બનાવવાની ભલામણ કરી છે. આવા ચોખા પર GSTઘટાડીને ૫% કરવામાં આવ્‍યો છે.

નાનકીન જેવા દેખાતા પોપકોર્ન પર ૫% GST લાગશે

રેડી ટુ ઈટ પોપકોર્ન પરના ટેક્‍સ અંગે પણ સ્‍પષ્ટતા આપવામાં આવી છે. જો પોપકોર્નમાં મીઠું અને મસાલા ઉમેરવામાં આવે અને તે નાનકીન જેવું લાગે તો તેના પર ૫ ટકા જીએસટી લાગશે. જો આ સિવાય અન્‍ય કોઈપણ સ્‍વરૂપે તેનું વેચાણ થશે તો તેના પર ૧૨ ટકા જીએસટી લાગશે. જો કે, જો પોપકોર્નમાં ખાંડ ઉમેરવામાં આવે છે, જેમ કે કેરેમેલ પોપકોર્ન, તો તેના પર ૧૮ ટકા જીએસટી લાગશે.

કાઉન્‍સિલે વીમા-સંબંધિત બાબતો પરના નિર્ણયો વધુ તપાસ માટે મુલતવી રાખ્‍યા છે. આ વિષય પર મંત્રીઓના જૂથ (GoM)ની બેઠક દરમિયાન કોઈ સર્વસંમતિ સધાઈ શકી નથી.