નવી દિલ્‍હીઃ વિદેશ મંત્રી  એસ જયશંકરે શનિવારે જણાવ્યું કે ભારત ક્યારેય પણ બીજાને તેમની પસંદ પર વીટો કરવાની મંજૂરી આપશે નહીં અને રાષ્ટ્રીય હિત અને વૈશ્વિક સુખાકારી માટે જે યોગ્ય હશે, તેને કોઈપણ દબાણ વિના કરશે. મુંબઈમાં એક કાર્યક્રમને વીડિયો સંદેશ દ્વારા સંબોધિત કરતા સમયે જયશંકરે કહ્યું કે ભારતના સમૃદ્ધ વારસાથી દુનિયાને ઘણું શીખવા મળી શકે છે, પરંતુ આ ત્યારે જ શક્ય છે જ્યારે ભારતીયો પોતાના પર ગર્વ કરે.
જયશંકરે કહ્યું કે આજે વિશ્વના લોકો અસ્વસ્થ આદતો, તણાવપૂર્ણ જીવનશૈલી અને વારંવાર થનારી હવામાનની ઘટનાઓથી સંઘર્ષ કરી રહ્યા છે. એવામાં ભારતના વારસામાંથી ઘણું શીખી શકાય છે. તેમણે કહ્યું કે વૈશ્વિકરણના આ યુગમાં ટેકનોલોજી અને પરંપરાએ એક સાથે મળીને આગળ વધવું જોઈએ. આ પ્રસંગે વિદેશ મંત્રી જયશંકરને 27મા SIES શ્રી ચંદ્રશેખરેન્દ્ર સરસ્વતી રાષ્ટ્રીય પ્રતિષ્ઠિત પુરસ્કારથી સન્માનિત કરવામાં આવ્યા.
વિદેશ મંત્રી જયશંકરે કહ્યું, 'સ્વતંત્રતાને ક્યારેય તટસ્થતા સાથે ભ્રમિત ન કરવી જોઈએ. આપણે આપણા રાષ્ટ્રીય હિત અને વૈશ્વિક કલ્યાણ માટે યોગ્ય પગલાં લેવાથી ગભરાઈશું નહીં. તેમણે કહ્યું કે ભારત ક્યારેય અન્યને તેની પસંદગીનો વીટો કરવાની મંજૂરી આપી શકે નહીં.'
જયશંકરે કહ્યું કે ભારત એક અસાધારણ રાષ્ટ્ર છે કારણ કે તે એક સભ્યતા ધરાવતો દેશ છે. તેમણે કહ્યું કે તેની સાંસ્કૃતિક શક્તિનો સંપૂર્ણ ઉપયોગ કરીને જ તે વૈશ્વિક સ્તરે પ્રભાવ પાડી શકશે. આ માટે જરૂરી છે કે યુવા પેઢી પોતાના વારસાનું મૂલ્ય સમજે. પરંતુ સૌથી મહત્ત્વની બાબત એ છે કે સામાજિક સ્તર પર તેની અસર થવી જોઈએ. વિદેશ મંત્રીએ કહ્યું કે આપણી પાસે વિકાસના ઘણા રસ્તા છે પરંતુ કેટલાક મુદ્દા એવા છે જેને ઉકેલવા પણ પડશે.