મુંબઈ :બોલિવૂડ સિંગર અભિજીત ભટ્ટાચાર્યએ તાજેતરમાં એક ઈન્ટરવ્યુમાં ભાગ લીધો હતો. આ દરમિયાન તેણે સલમાન ખાનથી લઈને શાહરૂખ ખાન સુધી બધાની વાત કરી. આ સાથે તેમણે રાષ્ટ્રપિતા મહાત્મા ગાંધી વિશે વિવાદાસ્પદ નિવેદન આપ્યું હતું. ઈન્ટરવ્યુમાં વાત કરતા અભિજીતે કહ્યું કે સંગીતકાર આરડી બર્મન મહાત્મા ગાંધી કરતા પણ મહાન છે. તેમણે કહ્યું કે આરડી બર્મન સંગીત જગતના રાષ્ટ્રપિતા હતા. તેમણે એમ પણ કહ્યું કે મહાત્મા ગાંધી પાકિસ્તાનના રાષ્ટ્રપિતા હતા.

શુભંકર મિશ્રાના પોડકાસ્ટમાં અભિજીત ભટ્ટાચાર્યએ કહ્યું, "સંગીતકાર આરડી બર્મન મહાત્મા ગાંધી કરતાં મહાન હતા. જેમ મહાત્મા ગાંધી રાષ્ટ્રપિતા હતા, આરડી બર્મન સંગીતની દુનિયાના પિતા હતા." એટલું જ નહીં, અભિજીતે મહાત્મા ગાંધીને પાકિસ્તાનના રાષ્ટ્રપિતા ગણાવ્યા.

અભિજીતે કહ્યું, "મહાત્મા ગાંધી રાષ્ટ્રપિતા હતા,  ભારત પહેલાથી જ ભારત હતું, પાકિસ્તાનનું સર્જન થયું હતું. ભૂલથી મહાત્મા ગાંધીને અહીંના રાષ્ટ્રપિતા કહેવામાં આવ્યા હતા.  જન્મદાતા એ હતા. પિતા એ હતા. દાદા એ હતા. નાના એ હતા. બધુ એ જ હતા.

અભિજીત ભટ્ટાચાર્યના કામની વાત કરીએ તો તેને સંગીતકાર આરડી બર્મન દ્વારા લોન્ચ કરવામાં આવ્યો હતો. તેણે પોતાનું પહેલું ગીત આશા ભોંસલે સાથે બંગાળી ફિલ્મ માટે ગાયું હતું. તેમની કારકિર્દીના શરૂઆતના દિવસોમાં તેઓ આરડી બર્મન સાથે ગાયક તરીકે સ્ટેજ શો કરતા હતા. અભિજીત ભટ્ટાચાર્યએ મિથુન ચક્રવર્તી, વિજય આનંદ, આમિર ખાન, શાહરૂખ ખાન, સલમાન ખાન, સૈફ અલી ખાન, સની દેઓલ, સંજય દત્ત, અક્ષય ખન્ના, અક્ષય કુમાર, હૃતિક રોશન, બોબી દેઓલ અને રણબીર કપૂર જેવા બોલિવૂડ કલાકારો માટે ગાયું છે.