હરિદ્વાર, તા.૨૬: ઉત્તરાખંડના હરિદ્વારમાં બુધવારે એક હૃદયદ્રાવક ઘટના બની હતી. ગુજરાતના એક પરિવારના બે સગીર બાળકોના ગંગા નદીમાં ડૂબી જવાથી મોત થયા છે. પોલીસે જણાવ્‍યું કે આ અકસ્‍માત ઉત્તર હરિદ્વારના સપ્તર્ષિ વિસ્‍તારમાં સંતમત ઘાટ પર સવારે ૧૦ વાગ્‍યે થયો હતો. અકસ્‍માત બાદ પરિવારજનોના આંસુ રોકાતા નથી.

ગુજરાતના તાપી જિલ્લાના બાજીપુરા ગામમાં રહેતા વિપુલ ભાઈ પવારનો પરિવાર ગંગામાં સ્‍નાન કરી રહ્યો હતો. દરમિયાન, પવારની ૧૩ વર્ષની પુત્રી પ્રત્‍યુષા અને છ વર્ષનો પુત્ર દર્શ અચાનક ગંગાના જોરદાર પ્રવાહમાં વહેવા લાગ્‍યો. ઘાટ પર હાજર પરિવારના સભ્‍યો અને અન્‍ય ભક્‍તો બાળકોને બચાવવા માટે દોડી આવ્‍યા હતા પરંતુ જોરદાર કરંટ અને ઉંડા પાણીના કારણે બંને બાળકો દૃષ્ટિથી ખોવાઈ ગયા હતા.

ઘટનાની માહિતી મળતા જ પોલીસ ઘટનાસ્‍થળે પહોંચી ગઈ હતી અને જઈ પોલીસ અને ડાઈવર્સની મદદથી બાળકોને શોધવાનું શરૂ કર્યું હતું. થોડા સમય બાદ બંનેને બેભાન અવસ્‍થામાં ઠોકર નંબર ૧૩ પાસે પાણીમાંથી બહાર કાઢવામાં આવ્‍યા હતા. પોલીસે જણાવ્‍યું કે બંનેને તાત્‍કાલિક હરિદ્વાર જિલ્લા હોસ્‍પિટલમાં લઈ જવામાં આવ્‍યા જયાં ડોક્‍ટરોએ બંનેને મૃત જાહેર કર્યા. બાળકોના મૃતદેહને પોસ્‍ટમોર્ટમ માટે સુરક્ષિત રાખવામાં આવ્‍યા છે. ઘટના બાદ પરિવાર પર દુઃખનો પહાડ છવાઈ ગયો છે. બાળકોના અકાળે મૃત્‍યુથી ઘાટ પર હાજર અન્‍ય ભક્‍તોને પણ દુઃખ થયું.