<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 28th December 2024

પિતાની મિલકતમાંથી દીકરીઓને કાઢી ન શકાય ૪૩ વર્ષની કાનૂની લડાઇ બાદ હાઇકોર્ટનો નિર્ણય

 

જમ્‍મુ, તા.૨૮: જમ્‍મુ કાશ્‍મીર અને લદ્દાખ હાઈકોર્ટે કહયું છે કે ઈસ્‍લામિક કાયદા મુજબ કોઈ પણ કારણસર મુસ્‍લિમ દીકરીને તેના પિતાની સંપત્તિથી વંચિત ન રાખી શકાય. કુરાન પણ પહેલા સ્‍ત્રીને અને પછી પુરુષને વારસાનો અધિકાર આપે છે. હાઈકોર્ટે ૪૩ વર્ષ જૂના કેસમાં મહિલાને મિલકતમાં હિસ્‍સો આપવાનો આદેશ આપ્‍યો હતો.

જસ્‍ટિસ વિનોદ ચેટર્જી કૌલની ખંડપીઠે કહ્‍યું કે આ કેસમાં અરજીકર્તા મુસ્‍લિમ છે. તેઓ રોજિંદા જીવનમાં નમાઝ, હજ, જકાત વગેરે જેવી ઇસ્‍લામિક વિધિઓનું પાલન કરે છે. જ્‍યારે દીકરીને મિલકતમાં હિસ્‍સો આપવાની વાત આવે છે ત્‍યારે કેટલાક લોકો પરંપરાના નામે તેનો ઇનકાર કરે છે. તેમણે કહ્‍યું કે પવિત્ર કુરાનની સુરા એન-નિસામાં ઉલ્લેખિત પુત્રીઓના વારસાના અધિકારો અપરિવર્તનશીલ છે. કોઈપણ વિલંબ અથવા પૂર્વગ્રહ વિના તેઓને સમર્થન આપવું જોઈએ. આ કિસ્‍સામાં, સ્‍ત્રીના અધિકારો છીનવી લેવા માટે કોઈ બહાનું વાપરી શકાય નહીં. કોર્ટે એ પણ સ્‍પષ્ટ કર્યું કે સંબંધિત મહેસૂલ સત્તાવાળાઓએ હાઈકોર્ટની ડિવિઝન બેંચના આદેશનું પાલન કરવું જોઈએ, જેને તેમણે ફગાવી દીધો હતો. કોર્ટે આદેશમાં કહ્‍યું કે ડિવિઝન બેંચના આદેશ મુજબ મહિલાના બાળકોને તેમની માતાનો હિસ્‍સો આપવામાં આવે. આનો અમલ ત્રણ મહિનામાં થવો જોઈએ.

મુનવ્‍વર ગનાઈની પુત્રી મુક્‍તિએ લગભગ ૪૩ વર્ષ પહેલા મુસ્‍લિમ પર્સનલ લો હેઠળ તેના પિતાની સંપત્તિના એક તળતીયાંશ ભાગ પર પોતાનો હક દાવો કરીને કેસ દાખલ કર્યો હતો. તેને ટેકનિકલ આધાર પર ફગાવી દેવામાં આવી હતી. આ દરમિયાન મુક્‍તિનું મોત થયું હતું. તેમના બાળકોએ તેમના હિસ્‍સા અંગે ન્‍યાય માટે કોર્ટમાં અરજી કરી હતી. ડિવિઝન બેન્‍ચે ૧૯૯૬માં મુક્‍તીના ઉત્તરાધિકારની પુષ્ટિ કરી હતી, પરંતુ મહેસૂલ સત્તાવાળાઓ અને સેટલમેન્‍ટ કમિશનરે ડિવિઝન બેંચના નિર્ણયની અવગણના કરી હતી અને મુક્‍તિને ઉત્તરાધિકારમાંથી બાકાત રાખ્‍યા હતા. જેના પર મુક્‍તિના બાળકો હાઈકોર્ટ પહોંચ્‍યા હતા.

(3:38 PM IST)