રોટલી પીરસવામાં મોડું થતાં વરરાજાએ તોડ્યા લગ્ન
યુપીના ચંદૌલીમાં એક ચોંકાવનારી ઘટનાએ પોલીસકર્મીઓને પણ ચોંકાવી દીધા મામલો પોલીસ સુધી પહોંચ્યોઃ યુવતીના પરિવારજનોએ જણાવી કહાની
ચંદૌલી, તા.૩૦: ઉત્તર પ્રદેશના ચંદૌલી જિલ્લામાં સ્થિત હમીદપુર ગામમાં લગ્નનો આનંદનો પ્રસંગ દુઃસ્વપ્નમાં ફેરવાઈ ગયો જયારે વરરાજાએ માત્ર રોટલી મળવામાં વિલંબને કારણે લગ્ન કરવાની ના પાડી દીધી. આ વિચિત્ર ઘટનાએ સુંદર પોશાક પહેરેલી કન્યાનું હૃદય ભાંગી પડ્યું હતું અને તે લગ્ન સ્થળ પર રાહ જોતી બેઠી હતી. જયારે વરરાજાએ થોડા સમય પછી બીજા કોઈ સાથે લગ્ન કર્યા હોવાના અહેવાલ છે.
જેના કારણે દુલ્હનનો પરિવાર પણ ખૂબ જ નાખુશ થઈ ગયો હતો. ૨૨ના ડિસેમ્બરે યોજાનાર આ લગ્ન ૭ મહિના પહેલા નક્કી કરવામાં આવ્યા હતા. જયારે લગ્નની જાન કન્યાના દરવાજે આવી ત્યારે પરિવારે લગ્નના મહેમાનોનું મીઠાઈઓથી સ્વાગત કર્યું અને રાત્રિભોજન પીરસ્યું. આ સમય દરમિયાન, વર પક્ષના એક સભ્યએ કન્યા પક્ષ પર રોટલી પીરસવામાં વિલંબનો આરોપ લગાવ્યો.
આ ઘટનાથી વરરાજા ખૂબ ગુસ્સે થઈ ગયો. જે બાદ યુવતીના પરિવારજનો તેને અને તેના સંબંધીઓને શાંત પાડવાનો પ્રયાસ કરતા રહ્યા. પરંતુ મામલો વધુ વણસી ગયો. મહેતાબ નામનો વર અચાનક લગ્નમાંથી જ ભાગી ગયો હતો. જે બાદ યુવતીના પરિવારજનોમાં તણાવ વધી ગયો હતો. હિન્દુસ્તાન ટાઈમ્સે અહેવાલ આપ્યો છે કે છોકરાએ ટૂંક સમયમાં તેના એક સંબંધી સાથે લગ્ન કરી લીધા છે.
જેના કારણે કન્યા અને તેના પરિવારનું અપમાન થયું હતું. આ ઘટના પોલીસ સુધી પહોંચી ત્યારે પોલીસે પણ આ મામલે કોઈ ખાસ કાર્યવાહી કરી ન હતી. જયારે મામલો ૨૪ ડિસેમ્બરે ચંદૌલી એસપી પાસે પહોંચ્યો તો તેમણે કાર્યવાહીનું આશ્વાસન આપ્યું.
આ ઘટનાથી દુઃખી થયેલા કન્યાના પરિવારે નજીકના પોલીસ સ્ટેશનમાં ફરિયાદ નોંધાવી છે. કન્યાના પરિવારે જણાવ્યું કે લગ્નમાં દહેજ તરીકે ૧.૫ લાખ રૂપિયા આપવામાં આવ્યા હતા. તેમજ તૈયારીઓમાં કુલ ૭ લાખ રૂપિયાનો ખર્ચ કરવામાં આવ્યો છે.
દુલ્હનના પરિવારે વરરાજાના પરિવારના ૫ સભ્યો વિરુદ્ધ FIR દાખલ કરીને કાર્યવાહીની માંગ કરી છે. દુલ્હનના ભાઈ રાજુએ એસપીના આશ્વાસન છતાં કાર્યવાહી ન કરવા બદલ પોલીસની ટીકા કરી છે. આ ઉપરાંત પોલીસ સ્ટેશનની અંદર મહિલાઓ માટે હેલ્પ ડેસ્ક બનાવવાની માંગ પણ મુખ્યમંત્રી યોગી આદિત્યનાથને કરવામાં આવી છે.
(11:48 AM IST)
છેલ્લા 8 દિવસમાં સૌથી લોકપ્રિય 
