નવા વર્ષમાં ઉત્તર ભારતને કડકડતી ઠંડીનો  સામનો કરવો પડશે. ભારતીય હવામાન વિભાગ (IMD) એ નવી આગાહી જાહેર કરી છે. આ મુજબ 4 જાન્યુઆરીએ ઉત્તર ભારતમાં નવા વેસ્ટર્ન ડિસ્ટર્બન્સની શક્યતા છે.

અનુમાન મુજબ 30 ડિસેમ્બરથી ઉત્તર ભારતમાં પણ શીત લહેર વધવાની આશંકા છે. 1 થી 3 જાન્યુઆરી દરમિયાન પહાડી વિસ્તારોમાં છૂટોછવાયો વરસાદ અને હિમવર્ષા થવાની સંભાવના છે. વેસ્ટર્ન ડિસ્ટર્બન્સના કારણે પંજાબ અને હરિયાણામાં પણ વરસાદની શક્યતા છે.
IMD અનુસાર, આગામી 2-3 દિવસ દરમિયાન ઉત્તર-પશ્ચિમ ભારત અને ઉત્તર-પૂર્વના રાજ્યોમાં ગાઢથી ખૂબ ગાઢ ધુમ્મસ અને ઠંડા દિવસની સ્થિતિ જોવા મળશે. રાજસ્થાન, પંજાબ, હરિયાણા અને ચંદીગઢ ઠંડીની લપેટમાં છે. હવામાન વિભાગે આ રાજ્યોમાં ગાઢ ધુમ્મસનું એલર્ટ પણ જારી કર્યું છે.

બીજી તરફ હિમાચલ પ્રદેશમાં ઠંડીનું મોજું અને હિમવર્ષાને કારણે લોકોની મુશ્કેલીમાં વધારો થયો છે. જમ્મુ-કાશ્મીરમાં પણ ઠંડીનું મોજું ફરી વળ્યું છે.
અહી કડકડતી ઠંડી પડવાની શક્યતા છે

30 ડિસેમ્બરના રોજ હરિયાણા અને ચંદીગઢના જુદા જુદા સ્થળોએ ઠંડા દિવસથી ગંભીર ઠંડા દિવસની સ્થિતિ પ્રવર્તે તેવી શક્યતા છે. હવામાન વિભાગના એલર્ટ મુજબ, 30 ડિસેમ્બરે મોડી રાત્રે પંજાબ, હરિયાણા, ચંદીગઢ અને રાજસ્થાનના અલગ-અલગ સ્થળોએ ગાઢથી ખૂબ ગાઢ ધુમ્મસ છવાઈ શકે છે. રાજસ્થાનમાં પણ ઠંડા દિવસથી લઈને તીવ્ર ઠંડીના દિવસ જેવી સ્થિતિ જોવા મળશે.

31 ડિસેમ્બરે હિમાચલ પ્રદેશ અને રાજસ્થાનમાં ગાઢ ધુમ્મસની શક્યતા છે. જ્યારે પંજાબ, ચંદીગઢ અને હરિયાણામાં શીત લહેર રહેશે. આસામ અને મેઘાલયમાં પણ ગાઢ ધુમ્મસ રહેશે. 1 જાન્યુઆરીએ પંજાબ, હરિયાણા અને રાજસ્થાનમાં શીત લહેર આવશે. હિમાચલ પ્રદેશ, આસામ અને મેઘાલયમાં ગાઢ ધુમ્મસ રહેશે.

પંજાબ-હરિયાણા અને રાજસ્થાનમાં 2 જાન્યુઆરીએ પણ કોલ્ડવેવની અસર ચાલુ રહેશે. ગાઢ ધુમ્મસ ઘટશે. ઉત્તર પશ્ચિમ તરફથી આવતા પવનો જોરદાર રહેશે. વાતાવરણમાં ભેજનું પ્રમાણ પણ ઘટવાની ધારણા છે. આગામી પાંચ દિવસ દરમિયાન ઉત્તર પ્રદેશમાં લઘુત્તમ તાપમાનમાં 4-6 ડિગ્રી અને પંજાબમાં 3-4 ડિગ્રી સેલ્સિયસનો ઘટાડો થવાની શક્યતા છે. હરિયાણા, ચંદીગઢ, દિલ્હી અને રાજસ્થાનમાં કોઈ નોંધપાત્ર ફેરફારોની અપેક્ષા નથી.મધ્ય ભારતમાં આગામી 24 કલાક દરમિયાન લઘુત્તમ તાપમાનમાં કોઈ ફેરફાર થશે નહીં. આગામી 5 દિવસ દરમિયાન તાપમાનમાં 3-5 ડિગ્રીનો ઘટાડો થવાની શક્યતા છે.

આગામી 24 કલાક દરમિયાન પૂર્વ ભારતમાં લઘુત્તમ તાપમાનમાં કોઈ ફેરફાર થશે નહીં. આગામી 3 દિવસ દરમિયાન 3-4 ડિગ્રી સેલ્સિયસનો ઘટાડો થવાની સંભાવના છે.
આગામી 5 દિવસ દરમિયાન મહારાષ્ટ્રમાં લઘુત્તમ તાપમાનમાં 2-4 ડિગ્રી સેલ્સિયસનો ઘટાડો થવાની સંભાવના છે.