નવી દિલ્હી : કેન્દ્ર સરકારે કેરળના વાયનાડમાં થયેલી ભૂસ્ખલન દુર્ઘટનાને ગંભીર પ્રકૃતિની આફત ગણાવી છે. આ માટે, ગૃહ મંત્રાલયે કેન્દ્રીય કેબિનેટ સમિતિના મૂલ્યાંકનના આધારે ભૂસ્ખલનના વર્ગીકરણની પુષ્ટિ કરતો પત્ર રાજ્યને મોકલ્યો હતો. ગૃહ મંત્રાલયના આ પગલા બાદ હવે આપત્તિ સંબંધી આર્થિક મદદનો માર્ગ ખુલી ગયો છે.

ગૃહ મંત્રાલયના સંયુક્ત સચિવ રાજેશ ગુપ્તાએ 30 ડિસેમ્બરે મહેસૂલ વિભાગના મુખ્ય સચિવ ટિંકુ બિસ્વાલને પત્ર લખીને આને ગંભીર પ્રકારની આપત્તિ ગણાવી હતી. વાયનાડના કોંગ્રેસના સાંસદ પ્રિયંકા ગાંધીએ વાયનાડ દુર્ઘટનાને 'ગંભીર પ્રકૃતિની આપત્તિ' તરીકે જાહેર કરવાના નિર્ણય પર પ્રતિક્રિયા આપી છે. આ નિર્ણયને આવકારતાં તેમણે કહ્યું કે તે ચોક્કસપણે યોગ્ય દિશામાં લેવાયેલું પગલું છે.

પ્રિયંકા ગાંધીએ ઈન્સ્ટાગ્રામ પર લખ્યું, 'મને ખુશી છે કે ગૃહમંત્રી અમિતભાઈ શાહે આખરે વાયનાડ દુર્ઘટનાને ગંભીર પ્રકૃતિની આપત્તિ જાહેર કરવાનો નિર્ણય લીધો છે. આનાથી પુનર્વસનની જરૂરિયાતવાળા લોકોને ઘણી મદદ મળશે અને તે ચોક્કસપણે યોગ્ય દિશામાં એક પગલું છે. આ માટે વહેલી તકે પર્યાપ્ત ભંડોળ ફાળવવામાં આવે તો અમે બધા આભારી હોઈશું.

30 ડિસેમ્બરના પત્રમાં એમ પણ કહેવામાં આવ્યું હતું કે ગંભીર આપત્તિના કિસ્સામાં, 'રાજ્ય ડિઝાસ્ટર રિસ્પોન્સ ફંડ (એસડીઆરએફ) માંથી નાણાકીય સહાય પૂરી પાડવામાં આવે છે, જે તેમની પાસે પહેલેથી જ ઉપલબ્ધ છે. તે સ્થાપિત પ્રક્રિયા મુજબ નેશનલ ડિઝાસ્ટર રિસ્પોન્સ ફંડ (NDRF) માંથી આગળ લેવામાં આવે છે, જેમાં આંતર-મંત્રાલય કેન્દ્રીય ટીમની મુલાકાતના આધારે આકારણીનો સમાવેશ થાય છે.

ગૃહ મંત્રાલયે તેના પત્રમાં કેરળની પ્રાથમિક માંગને ધ્યાને લીધી છે. પરંતુ હજુ સુધી રાજ્યની લોન માફી અથવા રાહત કાર્ય માટે વધારાના ભંડોળની વિનંતીનો કોઈ જવાબ મળ્યો નથી. ઉપરાંત, પુનઃનિર્માણ માટે કેરળ સરકાર દ્વારા માંગવામાં આવેલા વિશેષ નાણાકીય સહાય પેકેજ અંગે હજુ સુધી કોઈ સ્પષ્ટતા નથી. આ મહિનાની શરૂઆતમાં પ્રિયંકા ગાંધી આ સંદર્ભે ગૃહમંત્રી અમિતભાઈ  શાહને પણ મળ્યા હતા.

29 જુલાઈના રોજ સવારે 2 થી 4 વાગ્યાની વચ્ચે વાયનાડના મુંડક્કાઈ, ચુરાલમ્માલા, અટ્ટમાલા અને નૂલપુઝા ગામમાં ભૂસ્ખલન થયું હતું. જેમાં 400થી વધુ લોકોના મોત થયા હતા. તે જ સમયે, પીએમ મોદીએ 10 ઓગસ્ટે ભૂસ્ખલન પ્રભાવિત વિસ્તારની મુલાકાત લીધી હતી. તેઓ આપત્તિગ્રસ્તોને પણ મળ્યા હતા. આ દરમિયાન કેરળના મુખ્યમંત્રી પિનરાઈ વિજયન પણ હાજર હતા