નવી દિલ્‍હી, તા.૮: ભારતમાં મતદારોની સંખ્‍યા ૯૯ કરોડને પાર પહોંચી ગઈ છે. આ માહિતી ચૂંટણી પંચ (EC) દ્વારા આપવામાં આવી છે. જાન્‍યુઆરી ૨૦૨૫ની મતદાર યાદી અનુસાર ગયા વર્ષની સરખામણીમાં ૨.૨%નો વધારો થયો છે. મહિલા મતદારોની સંખ્‍યામાં પણ વધારો જોવા મળ્‍યો છે. આ સમાચારમાં આપણે જાણીશું કે, મતદારોની સંખ્‍યા કેટલી વધી છે, કયા રાજયમાં સૌથી વધુ મતદારો છે અને મહિલા મતદારોની સ્‍થિતિ શું છે.

દેશમાં મતદારોની સંખ્‍યા ૯૯ કરોડને વટાવી ગઈ છે. ચૂંટણી પંચના મુખ્‍ય ચૂંટણી કમિશનર (CEC) રાજીવ કુમારે કહ્યું કે દેશમાં મતદારોની સંખ્‍યા ૯૯ કરોડના આંકડાને પાર કરી ગઈ છે. તે ટૂંક સમયમાં ૧૦૦ કરોડ (૧ અબજ) સુધી પહોંચશે. ૩૩ રાજયો અને કેન્‍દ્રશાસિત પ્રદેશોની અંતિમ મતદાર યાદી અનુસાર, ૧ જાન્‍યુઆરી, ૨૦૨૫ સુધીમાં મતદારોની સંખ્‍યા ૯૯ કરોડથી વધુ છે. નાગાલેન્‍ડ, સિક્કિમ અને ચંદીગઢનો ડેટા હજુ ડ્રાફટમાં છે. આ રાજયોના અંતિમ ડેટા આવ્‍યા બાદ કુલ સંખ્‍યા વધુ વધશે. નાગાલેન્‍ડ અને સિક્કિમની અંતિમ યાદી મંગળવારે અને ચંદીગઢની ૧૦ જાન્‍યુઆરીએ જાહેર કરવામાં આવશે.

કેટલા પુરુષ મતદારો અને કેટલા મહિલા મતદારો? TOI દ્વારા પ્રાપ્ત વિશિષ્ટ માહિતી અનુસાર, ૯૯ કરોડથી વધુ મતદારોમાંથી ૫૦.૭ કરોડ પુરૂષો, ૪૮.૩ કરોડ મહિલાઓ અને ૪૮,૮૭૦ ત્રીજા લિંગના લોકો છે. CEC રાજીવ કુમારે કહ્યું કે દેશમાં મહિલા મતદાતાઓની સંખ્‍યા પહેલીવાર ૪૮ કરોડને પાર કરી ગઈ છે. ચૂંટણી લોકશાહીના ઈતિહાસમાં આવું પહેલીવાર બન્‍યું છે.કયા દેશમાં કેટલા મતદારો છે? જાન્‍યુઆરી ૨૦૨૪ની મતદાર યાદીની સરખામણીએ આ વર્ષે કુલ મતદારોમાં ૨.૨%, પુરુષ મતદારોમાં ૧.૯% અને મહિલા મતદારોમાં ૨.૫%નો વધારો થયો છે. મતદારોની વસ્‍તીનો ગુણોત્તર પણ ગયા વર્ષના ૬૬.૮ થી વધીને ૬૭.૮ થયો છે. એ જ રીતે, ૧૦૦૦ પુરૂષ મતદારોએ સ્ત્રી મતદારોનો ગુણોત્તર પણ ૯૪૮ થી વધીને ૯૫૪ થયો છે.

આ રાજય મોખરે છે. જો આપણે રાજયવાર આંકડાઓ પર નજર કરીએ તો, ઉત્તર પ્રદેશમાં સૌથી વધુ ૧૫.૩ કરોડ મતદારો છે. આ પછી મહારાષ્ટ્રમાં ૯.૮ કરોડ, બિહારમાં ૭.૮ કરોડ, પશ્ચિમ બંગાળમાં ૭.૬ કરોડ અને તમિલનાડુમાં ૬.૩ કરોડ મતદારો છે. મતદાર-વસ્‍તી ગુણોત્તરમાં લક્ષદ્વીપ આગળ છે, જયાં તે ૮૨.૨ છે. આ પછી કેરળમાં રેશિયો ૭૭.૧ અને પશ્ચિમ બંગાળમાં ૭૫.૧ છે.