વિશાખાપટ્ટનમ. વડાપ્રધાન મોદીએ આંધ્રપ્રદેશના વિશાખાપટ્ટનમમાં રોડ શો કર્યો હતો. આ દરમિયાન તેમની એક ઝલક મેળવવા માટે લોકો રસ્તા પર એકઠા થઈ ગયા હતા. બધે લોકો જોવા મળ્યા. લોકોએ વડાપ્રધાન પર ફૂલોની વર્ષા કરી હતી. રોડ શો દરમિયાન મોદી સાથે આંધ્રપ્રદેશના મુખ્યમંત્રી ચંદ્રબાબુ નાયડુ અને નાયબ મુખ્યમંત્રી પવન કલ્યાણ હાજર રહ્યા હતા.

  પીએમ મોદી એરફોર્સના વિમાન દ્વારા વિશાખાપટ્ટનમ પહોંચ્યા હતા. એરપોર્ટ પર રાજ્યપાલ એસ અબ્દુલ, મુખ્યમંત્રી ચંદ્રબાબુ નાયડુ અને નાયબ મુખ્યમંત્રી પવન કલ્યાણ દ્વારા તેમનું સ્વાગત કરવામાં આવ્યું હતું. આ પછી નરેન્દ્ર મોદીએ રોડ શો કર્યો હતો.

સીએમ નાયડુએ X પર પોસ્ટમાં કહ્યું કે આ દિવસ આંધ્ર પ્રદેશ માટે એક મોટી ઉપલબ્ધિ છે. પ્રધાનમંત્રીએ 2 લાખ કરોડ રૂપિયાથી વધુના પ્રોજેક્ટનું ઉદ્ઘાટન અને શિલાન્યાસ કર્યું છે

વિશાખાપટ્ટનમમાં આંધ્ર યુનિવર્સિટીના એન્જિનિયરિંગ કોલેજ મેદાનમાં એક જાહેર સભાને સંબોધતા વડાપ્રધાને કહ્યું કે આંધ્ર પ્રદેશ માટે આ એક મોટો દિવસ છે. ગ્રીન એનર્જી પહેલ અને મહત્વપૂર્ણ માળખાકીય વિકાસ પ્રોજેક્ટો શરૂ કરવામાં આવ્યા છે. અમારી સરકાર આંધ્રપ્રદેશના વિકાસ માટે પ્રતિબદ્ધ છે.

  પીએમ મોદીએ વિશાખાપટ્ટનમ નજીક પુડીમધકા ખાતે NTPC ગ્રીન એનર્જી લિમિટેડના 1 લાખ 85 હજાર કરોડ રૂપિયાના અત્યાધુનિક ગ્રીન હાઇડ્રોજન હબ પ્રોજેક્ટનો શિલાન્યાસ કર્યો. તે NTPC ગ્રીન એનર્જી લિમિટેડ અને ન્યૂ એન્ડ રિન્યુએબલ એનર્જી ડેવલપમેન્ટ કોર્પોરેશન ઓફ આંધ્રપ્રદેશ (NREDCAP) વચ્ચેના સહયોગથી ઉદ્દભવે છે. તે ગંગાવરમ પોર્ટ નજીક 1,200 એકરમાં બનાવવામાં આવશે. અહીં ગ્રીન એમોનિયા, મિથેનોલ અને યુરિયા સહિતના રસાયણોનું ઉત્પાદન કરવામાં આવશે. આનાથી 2032 સુધીમાં અંદાજે 57,000 નોકરીઓનું સર્જન થશે

   પીએમએ  4,593 કરોડ રૂપિયાના 10 રોડ નિર્માણ અને વિસ્તરણ પ્રોજેક્ટનો શિલાન્યાસ કર્યો. તેમણે રૂ. 6,028 કરોડના ખર્ચે છ રેલવે પ્રોજેક્ટનો શિલાન્યાસ પણ કર્યો હતો.

   પીએમ મોદીએ તિરુપતિ જિલ્લામાં 2139 કરોડ રૂપિયાના કૃષ્ણપટ્ટનમ ઇન્ડસ્ટ્રીયલ પાર્ક (KRIS) શહેરનો શિલાન્યાસ કર્યો. આ પાર્ક 2,500 એકરમાં બનશે. તેનાથી 50,000 લોકોને રોજગાર મળવાની આશા છે

તેમણે વિશાખાપટ્ટનમ ખાતે સાઉથ કોસ્ટ રેલ્વે ઝોન હેડક્વાર્ટર અને વિશાખાપટ્ટનમ નજીક નક્કાપલ્લી ખાતે રૂ. 1,877 કરોડના ખર્ચે બલ્ક ડ્રગ પાર્કના નિર્માણ માટે શિલાન્યાસ પણ કર્યો હતો. આનાથી રૂ. 11,542 કરોડનું રોકાણ આકર્ષિત થશે. 54,000 નોકરીઓનું સર્જન થશે

પીએમ મોદીએ રાયલસીમા ક્ષેત્રમાં રૂ. 3,044 કરોડના ખર્ચના સાત રોડ પ્રોજેક્ટ્સ અને રૂ. 5,718 કરોડના ખર્ચની ત્રણ રેલવે લાઇનનું ઉદ્ઘાટન કર્યું હતું.